1 Nalawahabei Nabureme súnwandan,

leremuhaba niyuma lun súnwandan.

2 Pántatina lau Aburemei;

aganba huméi,

gunda huguyame huguya wügüriña ǘnabugutiña!

3 Weremuha úara lau aban umalali,

luagu luéirigun Aburemei.

4 Agúahatina lun Nabureme,

aba lóunabunina gidaléi sun anufudei nuéi.

5 Ha arihubaña luagun Aburemei

rédeitiña lau ugundani;

ani merededügübaña lau busiganu.

6 Fugiabu meha nuguya,

wátina lun Nabureme, aba laganbunina,

aba lesefurunina lídangiñe sun nidiheri.

7 Góunigi lumutiña lani Aburemei ánheli

ani sefuláña sun ha íchugubaña inebesei lun Aburemei.

8 Houcha humá, ariha humeime luagu buidu lan Aburemei.

Fuleseiwatiña gürigia ha hemenigibaña luagu Bungiu!

9 Inebelá Aburemei hun sun huguya

ha deregeguabaña houngua lun,

úabei hemegeirun ha inebehabubaña lun.

10 Rédeitiña ha rísibaña gudemeñu,

áfaga hagía ilamaü,

ánhaña ha áluahabalin Aburemei,

memegeirúnbaña ni kata.

11 Higougu nirahüñü, aganba humana:

narufudahaba hun lun inebe lan Aburemei hun.

12 Busentibu san babagaridun saragu dan?

Busentibu san bíchugun ugundani bungua lidan bibagari?

13 Rédeiboun biñeñe luéi ladimurehoun wuribati;

mariñagalá biyuma marasualugu.

14 Disebá luéi wuribani,

adügabéi le buídubei,

áluahabei darangilaü, ábame bafalaruni.

15 Góunigi lumutiña Aburemei ha harumabaña émeri,

ru lumuti giñe larigei lun laganbuniña.

16 Magundanti Aburemei hau ha adügübaña wuribani,

aranseñu liña lun lagidaruni laritawagúniwa hawagun ubouagugiñe.

17 Téniti Aburemei lun hagúarahan ha harumabaña,

sefu lumutiña giñe lídangiñe wuribani.

18 Yarafati Aburemei lun lesefuruniña

ha gáribei hasandirunu hanigi,

ha féridi hamaalibei hemenigin.

19 Sügütiña ha harumabaña lídangiñe saragu wuribani,

gama lumoun sefu lumutiña Aburemei lídangiñe súngubei.

20 Góunigi lumuti Aburemei sun habu,

máhalachawagunbei ni aban lídangiñe.

21 Ha salufuribaña áfaragua lumutiña hariban guánarügü;

habeichawaguba ha iyereehabúbaña houn ha harumabaña.

22 Sefu lumuti Aburemei habagari lubúeingu;

mabeichawagunbaña ha afiñebaña luagu!