1 Nánigu, teni humá lun narufudahan;

aganba huméi le nariñagubei hun!

2 Nadimureha lau hénpulu;

nadimureha luagu burí katei

le meha aramudaguati lúmagiñe binadu dan.

3 Le aganba wamaalibei subudi waméi,

le habahüdagubei meha wagübürigu woun;

4 maramudun wabéi hawéi wasaanigu.

Walawahabei Aburemei hama

iseri gürigia ha lúnbaña hayabin,

wadimurehaba luagu lubafu

luma burí luagu katei buiti le ladügübei.

5 Adügati Bungiu aban lúrudu lun Hakobu;

ariñagati houn lánigu Ísüraeli,

ida luba lan hóuserun

ariñaga ligía houn wagüchagu

lun harufudahani houn hadügawagun,

6 subudi hamaamugei iseri gürigia ha lúnbaña hayabin ubouagun,

isaanigu ha lúnbaña hágurahoun,

arufudaha hameime isaanigu hagía houn hasaanigu;

7 lun hafiñerun luagu Bungiu,

mabulieidun hameime le ladügübei;

lun hagunfulirun luma lugumadin

8 lun mamaganbadi hamá

kei hagüchagu ha meha úabei deregüdaü

tidan hanigi luma lidan hani sífiri;

ha meha magunfulirunbaña luma Bungiu!

9 Ha lani Éfürain türibu,

ha meha táubaña gimara,

ru hamuti hanagan lidan luéyuri wuribu;

10 minebenti hadaradun luma Bungiu houn,

maha hagía lun hagunfulirun luma larufudahan.

11 Bulíei hamuti le buga ladügübei,

katei buíduburiti le larufudubei houn.

12 Adügati buga Bungiu saragu katei buiti hagibugiñe hagübürigu

lóubawagu Soán le uburugubei Ehiptu:

13 fánreingua lumuti barana,

aba hásügürün Ísüraelina labadinaguagiñe

liñuraguati barana hóubawagugiñe kei baríeiru.

14 Adundeha lumutiña wéyuagu lábugiñe aban dúeri,

áriebu lábugiñe aban larugounga lauti watu gemeti.

15 Fánreingua lumuti dübü lidan fulasu mageirawati

aba hatun duna darí lagidarun hamagürabu.

16 Adügati Bungiu lun láwiyurun

duna le éibaaguati lídangiñe dübü!

17 Gama lumoun afigouhamémetiña ligibugiñe Bungiu;

iñuraguatiña houngua luagun Bungiu

lidan fulasu mageirawati.

18 Álugatiña hóuchaguni lau hamuriahan éigini kei habusenrun.

19 Adimurehatiña wuriba luagu, hariñagati:

«Gayaraabei funagia léheraagun woun

lidan fulasu mageirawati?

20 Inarüni luagu bougua lani Bungiu dübü;

ani áwiyuha lan giñe duna lídangiñe dübü ligía

kei aban duna éibaaguati,

aba labuinchun múa, gama lumoun,

gayaraabei funa san giñe líchugun fein

luma úi houn lumutuniña?»

21 Dan laganbunbalin Aburemei katei le, aba lagañidun;

aba ladurangun ligañi kei watu gemeti hawagun lánigu Hakobu!

22 Ladüga mafiñerun hamá luagu Bungiu

mafiñen hagía luagu lídehan.

23 Lau sun lira, aba líchugun Bungiu dimurei lun dúeri

aba ladaaruni lubenari sielu;

24 aba láhuyagüdün maná,

türigu siélugiñeti houn lumutuniña lun heigin!

25 Hóutiña lubeiti gürigia heigan ánheligu fein!

Hóugüda lumutiña Bungiu darí hakimuledun!

26 Aba láfurun ligarabalin labouchagüle weyu

luma áraabugiñeti siélugiñe;

lanügün Bungiu lau lubafu!

27 Áhuyagüdati úi houn lumutuniña;

ábürühatiña dunuru houn kei sagoun baranahana!

28 Ábürügüda lumutiña Bungiu

tamidoun hakianpun luma geyegua tau.

29 Aba heigin darí hakimuledun,

ítara liña lubeiti líchuguni Bungiu le habusenrubei houn.

30 Gama lumoun másugili yebe heigin,

aniheingua yebe éigini hayumulugu,

31 danbei lábürühan ligañi Bungiu hawagun

aba láfaraguniña wügüriña ha héretimabaña.

Hilagüda lumutiña habuidun-agei nibureintiña

hádangiñe lánigu Ísüraeli!

32 Lau sun lira ábaya hafigouhan;

mafiñeruntiña luagu burí lubuidun katei le ladügübei Bungiu.

33 Ligía lagumuchaguagüdünbaliña Bungiu

kamá hamuga aban awaraguni,

labadinagua aban katei lánina anufudei.

34 Danha le láfaragun Bungiu hádangiñe,

ligíaha háluahani ha híbiri,

ábaha hagiribudun lun,

aba háluahani memeraagunga;

35 ligíaha haritagun luagun Bungiu

lun lóunigiruniña luma lun lesefuruniña.

36 Gama lumoun hariñagaha iyeeni buíduburiti lun

lau hayuma tuma hañeñe,

37 ladüga magunfulirun hamá lau hadaradun luma

ni aban wéiyaasu.

38 Gama lumoun gudemeheitiña lun Bungiu,

ábaha feruduna lániña magünrinchagun lumutiñaha;

saraguha wéiyaasu, ígira lumuti agañiduni

aba mígiraguagüdün lan lungua lun igañi.

39 Haritagua lumuti Bungiu luagu wügüriña lan hagía,

luagu ítara haña lan kei garabali le ñǘdünbei

ani magiribudúnhali.

40 Gíbeti wéiyaasu híchugun mebereseni lau le lubeibei Bungiu

gáñigüda haméi lidan fulasu mageirawati!

41 Ábayaha hóuchaguni,

híruguagüda hamutiha Lubungiute Ísüraeli!

42 Maritaguntiña luagun weyu lügüra

dan le lesefurunbaliña Bungiu

lau lubafu hawéi háganiñu;

43 dan le ladügünbei burí katei wéinamuti

le garíawaseti yágüta lóubawagu Ehiptu;

44 dan le lasaliraguagüdünbalin burí lidunari Ehiptu hítaüme,

darí lun siñá lan hátuni Ehiptuna.

45 Óunahati gunga hawagun hama húa,

lun hagünrinchaguni sun katei;

46 derege lumuti le halubahabei lídangiñe hachari

le hawadigimaribei houn chagagaru.

47 Günringua lumuti hanadürigu

lau lúbara huya dereguati luma dübü.

48 Hilaguatiña halügüniña bágasu hama mudún

lábugiñe lúbara huya dereguati luma labirihaniga;

49 óunaha lumuti Bungiu ligañi hawagun:

Igañi, asiadirúni luma idiheri,

kei óunagüleigu lánina wuribani.

50 Aba lígiraguagüdün lungua lun ligañi!

Úati feruduna lani habagari,

deregerügü lumutiña lun óunweni;

51 áfaragua lumutiña furumiñetiña

hasaanigu sun tílana muna Ehiptuna!

52 Sagá lumutiña Ísüraelina ñéingiñe kei mudún;

alidiha lumutiña lumutuniña labadinagua fulasu mageirawati;

53 barǘ lumutiña luéigiñe üma chóuruti

lun manufudebaña lan;

ánhaña háganiñu, daruguati barana hau.

54 Barǘ lumutiña Bungiu lánigu lidoun fulasu le sándubei;

lidoun áraabu le guánarügü lagañeirubei!

55 Gidá lumutiña gibe tubungiutegu hagibugiñe Ísüraelina,

fánreingualei múa houn lánigu hadan hani türibu,

aganawagüdalaña tidan kianpu-agei.

56 Gama lumoun aba hóuchaguni Bungiu le Íñugutimabei

lau hiñuragun houngua luagun,

ani magunfulirun haméi lugumadin;

57 aba hígiruni Bungiu,

magunfuliruntiña ítara kei meha hadüga hagübürigu,

guribiguatiña kei tebu gimara le mederebuguti!

58 Gáñigüda hamuti lau burí hani latarü houn habungiutegu

huduguatiña houn guáriua, emeidigüda hamuti.

59 Gáñiti Bungiu dan larihinbalin katei le

aba labuguniña Ísüraelina luáriua;

60 aba lígirunu lisanduariun to Siloboun,

to meha lúbanboun hadan gürigia.

61 Ígirati lun hanügünu láganiñu bágüsi lánina daradu

to arufudubalin luéirigun luma lubafu.

62 Wéiriti lagañidun hama lánigu,

darí lun lederegeruniña tun hefeinte háganiñu.

63 Aba hóunwegun nibureintiña gudawarügü;

aba lúadun uremu lánina maríei houn adarigu!

64 Áfarawaguatiña fádirigu tau eféin,

ani mayahuahantiña hámarigu hárigi.

65 Gama lumoun aba lagagudun Bungiu

kamá lídangiñe aban idabagu,

kei aban wuriburuguna le agiribudaguti

lárigoun tídangiñe diwéin,

66 aba láfaraguniña láganiñu, aba hanurahan luéi;

ru lumutiña lidan busiganu lun súnwandan!

67 Bugá lumutiña giñe tílana luban Hosé luáriua;

manúadirun lumutiña lani Éfürain türibu;

68 lubaragiñe lira aba lanúadiruniña lani Hudá türibu;

luma wübü Sión le hínsiñebei lun.

69 Aba lábunagunu lisanduariun, íñutu kei sielu,

derebugugüdaloun lun súnwandan kei múa le ladügübei.

70 Anúadira lumuti Dawidi,

le meha amainihabei mudún,

71 aba lagidaruni luéi lerederun hárigi hárigi mudún,

lun lóunigiruniña lumutuniña Bungiu,

lun ligíaba lan amainiraña Ísüraelina.

72 Aba lóunigiruniña Dawidi lumutuniña Bungiu;

góunigilaña ani alidiha lau úhabu benefati

tuma anigi harumatu.