1 Wéiriguti Aburemei!

Gadünati Wabungiute lun lichugún uéiriguni lun

lidan luburugute, luma lidan luwübüri le sándubei!

2 Ma lubuidun liñun wübü Sión, yágüta luéigiñe nórute!

Ligía lagundaaraguagülebei sun ubóu!

Ligía luburugutebei Bungiu le urúei.

3 Anihein Bungiu tidan palasiu to Herusalénboun;

arufudaguaali lungua kei aban aramudaguagülei le chóuruti.

4 Óundaraguatiña urúeigu,

aba hawanserun luagun úara;

5 gama lumoun dan harihini uburugu aba taweiridun hanigi,

aba mederaguagüdün hamá, aba hanurahan.

6 Aba lárügüdüniña anufudei:

Aba haguribihan lau igarigu kei würi dan le tágurahan;

7 kei garabali le áfuruti luéigiñe labouchagüle weyu

le burí agünrinchagubarun lugunena Tárüsisi.

8 Ariha wamaali lau wagu, le meha abahüdawagubei woun

luburuguterugu Wabungiute, Wabureme Suntigabafu.

Lararamagüdübei Aburemei Herusalén buidu lun súnwandan!

9 Bungiu,

haritaguatiwa luagun lueirin bínsiñehabu búbiñe,

10 Bungiu,

adimurehóuati buiti buagu lidan sun ubóu,

kei le yuubei lun biri,

rútibu irichaü lau bubafu.

11 Gundaagualá luwübüri Sión.

Achubaha hamá lílana burí uburugu Hudá lau ugundani,

luagu burí liricha baguseragüdün!

12 Héibuga geyegua lau Sión

habahüdeime burí wáyelesi le ñeinbei;

13 ariha huméi burí lubarieirun tuma burí lani palasiu,

gayara láamuga habahüdagun houn iseri inebanfangu,

14 luagu ítara liña lan Wabungiute, súnwandan.

Ligía adundehabaliwa lun sun dan!