1 Nabureme, aganbabána,

ladüga wéiriti nirun luma nugudemen;

2 góunigibana, ladüga gúnfulitina buma.

Buguya Nubungiutebei,

sefubéi bubuein le, le afiñebei buagu!

3 Nabureme, gudemená bun,

au le ayumuragubei bun súnwandan.

4 Nabureme, gúndaaguagüdaboun nanigi,

ladüga búmounñein nayumuragun.

5 Ladüga, buguya Nabureme,

buítibu ani gíchigadi buguya ferudun;

buítibu hama sun ha ayumuragubaña bun.

6 Nabureme, aganbabéi nafurieidun,

tenibá lun nayumuragun!

7 Wátina buagu lidan nidiheri,

ladüga óunaba bumutina.

8 Úati Bungiu bibe, Aburemei!

Úati ni aban adügüti katei burí le badügübei.

9 Nabureme,

adüga baaña sun néchanigu,

hayabinba lun heremuhan bun

luma lun híchugun uéiriguni lun biri.

10 Ladüga buguyarügüñein Bungiu,

wéirigutibu adügatibu giñe katei buíduburiti!

11 Nabureme, arufudabéi bémeri nun,

lun nafalaruni lau gúnfuli.

Adügabá lun inebe lan biri tun nanigi.

12 Nabureme, Nubungiute,

neremuhaba bun tau sun nanigi,

níchuguba uéiriguni lun biri lun súnwandan.

13 Wéiriti bínsiñehabu nun!

Sefubáadina luéi nábürühan lidoun umúahaü!

14 Bungiu,

añahein saragu wuribatiña, hanarimetiña,

ha meberesenbaña bau, garabaguaaña nuagun,

ani busentiña háfarunina hilagubei.

15 Gama lumoun buguya, Aburemei,

Bungiu, gudemehabutibu,

gaguraasuntibu, ínsiñeni luma inarüni buguya.

16 Arihabána, gudemená bun!

Sefubéi bubuein le rubei bere lun!

17 Arufudabéi bareini nun furangu,

lun danme lan harihini ha iyereehabúbaña nun

lun hanügün busiganu.

Buguya Bungiu, rútibu ídemuei luma gurasu nun.