1 Nadiremuhaba luagu gareini ban súnwandan lidan neremuhan,

Nabureme nabahüdaguba súnwandan luagu gúnfuli ban.

2 Nadimurehaba luagu magumuchadi lan bínsiñehabu;

luagu masansiragun lan bigunfulin,

ítara kei masansiraguadi lan sielu.

3 Adügatibu aban daradu luma Dawidi;

füramasetibu lun bubuein le banúadirubei:

4 «Narúeihagüdübaña badügawagun beweñegua».

5 Aburemei,

sun ánheligu ha siélubaña alawaha hamuti bigunfulin

luma burí katei buiti le badügübei.

6 Úati ni aban bungiu, ni kata sielu ítarati kei buguya, Aburemei!

7 Bungiu wéiriti ani hanarimeti,

geyegu hau kátaña siéluna.

8 Aburemei, Bungiu, Suntigabafu,

bani sun ubafu ani geyeguati inarüni bau;

úati ni aban kei buguya!

9 Gabafutibu luagu lérouga baranaha

gáluma bumuti lanarime burí lugudi barana.

10 Dügügua bumuti animaalu hanarimeti le baranahana

kamá hamuga aban úgubu hilaali;

chagagua bumutiña báganiñu lau lere barüna.

11 Bani sielu luma múa;

buguya adügübalin ubóu luma sun katei le lídanbei.

12 Buguya adügübalin nórute luma suru;

eremuhati wübü Taworu luma Erümón lau ugundani lun biri.

13 Gabafuti barüna,

héreti búhabu le bóunwenren ani gagañeiraditi.

14 Derebuguñu liña lálana barúeihan luagu irichaü;

ñǘbuinti ínsiñehabuni luma inarüni bubaroun.

15 Aburemei,

fuleseiwatiña gürigia ha galawahadibaña bun lau ugundani

ani harugoungadagüdabei hémeri lau bigemeri,

16 ha gúndaabaña lidan biri sun dan

gunda hagía lau búaragun.

17 Le linarün katei buguya hérebei gürigia hagía,

buguya habuidunmeraü;

gánwounti wabafu lau lubuidun bareini.

18 Aburemei, ligía óunigirubaliwa!

Lubungiute Ísüraeli, ligía Warúeitebei!

19 Lidan meha amu dan, adimurehatibu meha lau uénedü

aba bariñagun houn bubueingu ha gúnfulibaña:

«Anúadahaadina aban ganigiti hádangiñe nánigu,

ru naali iñu, íderagua naali giñe.

20 Darí naali Dawidi le nubúein!

Hurugua naali lau garaba lun urúeime,

21 níderagubei súnwandan;

níchuguba erei lun lau nubafu!

22 Magayuahanbaña láganiñu luagu;

magañeirun hameime wuribatiña.

23 Naburechagubaña láganiñu;

nagidarubaña ligibugiñegiñe larihin!

Nagünrinchagubaña ha iyereehabúbaña lun!

24 Aniheinbei nínsiñehabu labu nugunfulin luma,

laganwounduba lubafu nuéigiñe;

25 nederebudagüdübei lubafu luma lugumadin

lúmagiñe barana Mediteraniu darí duna Éufüratesi.

26 Lariñaguba nun:

"Núguchi, buguya Nubungiutebei

le esefurubalina ágüdahalana".

27 Níchugubei liricha isaani le íbugañaü lun,

hóugiñe lurúeitegu ubóu.

28 Merederadibei línsiñe nun,

masansiraguadibei nidaradun luma.

29 Harúeihaba ladügawagun leweñegua

sun magumuchagungili lanme sielu.

30 «Gama lumoun anhein hígira narufudahan

mawinwandun hagíame richagu luma nugumadin,

31 anhein hadüraagua nilurudun

meberesen hagíame lau nugumadin;

32 nabeichubaña lau wewe luagu hariban;

33 gama lumoun mígirun nubéi línsiñe Dawidi nun,

madüraagun neime nidaradun luma.

34 Madüraagun nubéi nidaradun,

madüraaguneime nererun.

35 Fiñuhadina aban wéiyaasu luagu niri le sándubei,

ani meyeedun nubéi:

36 Harúeihaba ladügawagun leweñegua

sun anihagua lanme weyu.

37 Deregüdagu súnwandan kei hati!

Deregüdagu súnwandan sun anihagua lanme sielu!»

38 Gama lumoun Bungiu, fui baali urúei le banúadirubei;

gáñihadibu luma!

39 Dürüguabá bidaradun luma;

fuiba liridin múarugun.

40 Daratibu üma lidan sun lubarieirun;

günringuabá sun luburugute!

41 Sun ásügürütiña híweruhani le habusenrun;

adaaguatiña lubesinanigu bula lau.

42 Adügaadibu lun hiñuruni láganiñu háhabu

gúndaañu lau agañeiruni;

43 gidá bumuti tamana lefeinte

ani mágüdahan bumuti wuriburugu.

44 Gidaba luéirigun;

fuiba lálana larúeihan múarugun;

45 gidaadibu lídangiñe limigifen libagari,

buíngüda baali lau busiganu.

46 Nabureme,

ídaba san lásura baramudagun?

Gemeñu luba san bigañi súnwandan kei watu gemeti?

47 Nabureme, haritaguabatia luagu murusunrügüñein lan nibagari;

luagu murusunrügüñein lan habagaridun gürigia ha badügübaña.

48 Úati ni aban gayaraati labagaridun lun móunwenbei lan!

Úati ni aban lun gayara lan lesefurun luéi lubafu óunweni!

49 Aburemei,

hagéi san furumiñeti bínsiñehabu

le füramase bubéi lun Dawidi lidan bigunfulin?

50 Aburemei,

haritaguabatia luagu anabagua hamaniña saragu

gürigia bubueingu;

luagu barǘ nani anabawaguni ligía naniguagu.

51 Aburemei,

ítara liña hanabaguniwa báganiñu!

Ítara liña hanabaguni le banúadirubei le ñein lumuti lidin!

52 Alawahoualá Aburemei súnwandan!

Ítarala!