1 Nadimurehaba luagu buéirigun, Nubungiute Nurúeite

nalawahabei biri lun súnwandan.

2 Seremei nubadibu sagü weyu;

nalawahabei biri lun súnwandan.

3 Wéiriguti Aburemei ani gadünati lun lalawahóuniwa;

siñá wamuti luéirigun gunfuranda.

4 Lalawahóuba le badügübei

hámagiñe agübürigu hamoun isaanigu;

ladimurehóuba luagu burí katei gabafuti le badügübei.

5 Ladimurehóuba luagu bubafu le wéirigubei,

auti, nasaminaruba luagun burí

katei wéiriguti le badügübei.

6 Ladimurehóuba luagu burí

badüga le gabafubei ani hanarime,

auti, nadimurehaba luagu buéirigun.

7 Ladimurehóuba luagu lueirin bareidun,

laguarahóuba luagu richá ban.

8 Areidati Aburemei gudemehabu ligia;

gaguraasunti hínsiñehabu ligía.

9 Buiti Aburemei hama sun gürigia,

ani góunigi lumuti giñe le ladügübei lau areiduni.

10 Aburemei, alawahalabu sun le badügübei!

Seremei hamabu ha gúnfulibaña buma!

11 Hadimureha luagu luéirigun barúeihan!

Hadimureha luagu burí katei gabafuti le badügübei!

12 Subudigüdawalá bubafu houn gürigia

luma luéirigun barúeihan!

13 Aban arúeihani magumuchaditi barúeihan;

lunti súnwandan bagumadihan.

14 Góunigi lumutiña Aburemei ha éiguadubaña,

saragüda laña ha méreeñabaña.

15 Buagun hariha súngubei

agurabaha lun bíchuguni heigin houn lidan lidaani.

16 Tulé bumuti búhabu, aba bíchugun lau bugundan

houn sun gürigia luma houn animaalugu.

17 Richati Aburemei lidan sun lémeri,

areidati lidan sun ladüga.

18 Yarafati Aburemei houn ha agúahabaña luagu,

houn ha agúahatiña luagu lau hanarün.

19 Gúnfuli lumuti hayumahan ha inebehabubaña lun;

dan hamuriahan luma lun líderaguniña,

aganba lumutiña, sefuláña.

20 Góunigi lumutiña Aburemei ha hínsiñehabubaña lun,

ánhaña ha salufuribaña, günringua lumutiña.

21 Alawahalei niyumaaru Nabureme!

Alawaha huméi súngubei liri le sándubei,

guentó luma súnwandan!