1 Aranseñutiña nanigi, Nubungiute,

aranseñu lun teremuhan uremu bun!

Agaguduabá, nuani;

2 agaguduabá sun tuwuyeri árüpa,

nagaguduba lubá larugan!

3 Nalawahabadibu lau uremu hadan néchanigu,

Nabureme, nalawahabadibu haganagua amu gürigia.

4 Wéiriti bínsiñehabu sügǘ lau sielu.

Chülüti bigunfulin dagá lumoun lidingun sielu!

5 Nubungiute, lóugiñeñadibu sielu;

buin liña múa lau buéirigun!

6 Sefubáwa lau bubafu,

sefu hamaamuga ha hínsiñebaña bun;

óunababawa!

7 Adimurehati Bungiu tídangiñe luban sándutu ítara:

«Nafanreinragubei uburugu Sikemü lau ugundani,

fánreinguaneime fulasu wayati le lani Sukotu!

8 Nani Galaadü luma Manasési;

Éfürain ligía bunidi héreti le adouragubei lau nichügü,

Hudá ligía nubadunbei le aubei nagumadiha,

9 Moabü, ligía nágeidinabei lun nachibagun nungua;

níchuguboun nigeidin luagun Edomu;

nagúaruba agañeiruni hawagu Filistéana!»

10 Kaba san anügana lidoun uburugu baríeiruati?

Kaba san alidihana chülǘ Edomu?

11 Ladüga Buguya, Bungiu, fui baadiwa;

máfuridunhadibu wama ageindagua!

12 Íderaguabawa hawagu wáganiñu,

ladüga ni kata hídehan gürigia.

13 Lau lídehan Bungiu,

wadügüba katei wéinamuburiti;

laburechagubaña wáganiñu!