Álef

1 Fuleseiwatiña ha harumabei hóuseragun houngua,

falá haméi larufudahan Aburemei.

2 Fuleseiwatiña ha etenirubaña lun lugumadin

áluaha haméi tau sun hanigi;

3 ha madügünbaña ni kata wuribati,

ha afalarubalin lémeri Aburemei.

4 Ariñagaadibu lun lagunfulirúniwa

bugumadin lidan lubudubu.

5 Nederaguagüda hamuga lidan lagunfulirúniwa bilurudun!

6 Manügünbadina busiganu danme netenirun lun bugumadin.

7 Nalawahabadibu tau taruman anigi

danme furendei naali bererun le richabei.

8 Busentina nagunfuliruni bilurudun!

Mágurabana!

Bet

9 Ida lubagia gayara lan labagaridun nibureinti

aban ibagari harumati?

Lau lagunfulirun lau bererun!

10 Áluaha numutibu tau sun nanigi,

mígiraba lun nadireirun luéi bugumadin.

11 Areida naali bererun tidan nanigi

lun mafigounhan nan bigibugiñe.

12 Alawahóuatibu Aburemei!

Arufudahabei bilurudun nun!

13 Abahüdagua numuti sun lúrudu le bíchugubei

lau umalali héreti.

14 Nagundaaruba lidan lémeri bugumadin,

sügǘ lau lidan sun irisini.

15 Nasaminaruba luagu bugumadin,

teni aume lun bémeri.

16 Nagundaaruba lau bilurudun,

mabulieidagunbadina luéi bererun.

Guímel

17 Ruba ibagari lun bubuein le!

Ábame nidin lau le bubeibei!

18 Darabei nagu,

ariha náamugei lubuidun barufudahan.

19 Terencha au lidan múa le,

maramudabei bugumadin nuéi.

20 Súnwandan nasandirun idiheri tidan nanigi

le nabusenrun nasubudiruni bererun.

21 Adeinhatibu houn wuribatiña hama mabuchahatiña

ha ígirubalin bugumadin.

22 Dísegüdabana luéi burí anabawaguni

luma mebereseni le hadügübei,

ladüga ténihadina lun bugumadin.

23 Íbini habusenrun gürigia gabafutiña hadügün wuribani nun,

nasaminaruba luagun bilurudun.

24 Gúndaatina lau bugumadin

ligía eweridihabalina.

Dálet

25 Yarafaadina lun nounwen;

ruba ibagari nun kei füramase bani!

26 Ariñaga naali nigaburi bun,

ani óunaba báadina.

Arufudahabei bilurudun nun!

27 Ruba gunfurandaü nun lun nafalaruni bugumadin,

ladüga busentina nasaminarun luagu lubuidun barufudahan.

28 Ñaraguniña lidan láguirana igarigu;

íderaguabana deregüdagu náamuga,

kei füramase bani!

29 Dísegüdabana luéi lémeri iyeeni,

fuleseibana lau barufudahan.

30 Anúadira naali lémeri ibagari

ani busén numuti bererun.

31 Nabureme, badüleedina luagu bugumadin;

mabuinchagüdabana lau busiganu!

32 Deregeguatina nungua le gumuti lun bugumadin,

ladüga rútibu gunfurandaü nun.

He

33 Nabureme, arufudabéi lémeri bilurudun nun,

busentina nafalaruni darí lumoun lagumuhóun dan.

34 Ruba gunfurandaü nun lun nadügüni le barufudahabei;

busentina nafalaruni tau sun nanigi!

35 Barübana lidan lémeri bugumadin,

ladüga lídanñein nugundan.

36 Adügabá lun himei tani nanigi bugumadin,

luéi agañeiruni le wíyeti.

37 Mígiraba lun narihin hawagun búngiugu ha ni kátabaña,

ruba ibagari nun lun nafalaruni bémeri!

38 Gúnfulibei füramasei le badügübei nun

füramasei le bíchugubei houn ha inebehabubaña bun.

39 Dísegüdabei anabawaguni le ueibei nanufudeda nuéi,

ladüga buiti burí bererun.

40 Ayumaha naali bugumadin;

ruba ibagari nun, ladüga richatibu!

Vav

41 Nabureme, arufudabéi bínsiñehabu luma besefuhan nun,

ítara kei füramase bani.

42 Ítara luba gayara lan nóunabuniña ha anabagutina,

ladüga hemenigitina luagu bererun.

43 Magidarabéi dimurei lánina inarüni niyumulugugiñe,

ladüga ru naali nemenigin luagu bererun.

44 Busentina nadügüni le barufudahabei súnwandan!

45 Ítara luba gayara lan nabagaridun séfuñu,

ladüga falá naali bugumadin.

46 Nadimurehaba luagu bugumadin hagibugiñe urúeigu,

ani úabei nibusigari nan.

47 Ladüga hínsiñeti bugumadin nun

ani gúndaatina lau.

48 Hínsiñeti bugumadin nun ani ayumaha numuti,

saminatina saragu luagu bilurudun.

Zayin

49 Haritaguabei dimurei le meha bariñagubei nun,

le uágubei bíchigagüdei nemenigin nun.

50 Anihán nuguraasunbei lidan íruni:

Luagu rútibu lan ibagari nun lau bani füramasei.

51 Meredeti hanabagunina wuribatiña,

gama lumoun madiñutina luéi barufudahan.

52 Haritagua numuti binadu bererun,

aba nadarirun dǘgüdaguaü lidan.

53 Ha wuribatiña ha ígirubalin barufudahan,

gáñigüda hamutina.

54 Bilurudun neremunbei ya lidan fulasu le,

le ñein lubéi terencha nan.

55 Nabureme, áriebu, haritaguatina buagun;

busentina nadügüni le barufudahabei!

56 Anihán le yuubei nun:

Lun nidin lau le bubeibei.

Jet

57 Buguya Nabureme, buguya sun le númabei;

füramasehadina luagu nadügübei lan le bubeibei.

58 Hóuchaadina tau sun nanigi lun nagundaaragüdünibu;

óuserabana buidu, kei füramase bani.

59 Rédeitina asaminara luagu nusan

ábaya niabin lun nafalaruni bugumadin.

60 Óufudahaadina lun nadügüni

le lubeibei bugumadin.

61 Geyegua táadina hasadaran salufuritiña,

gama lumoun mabulieidun numuti barufudahan.

62 Saratina amidi áriebu eteingirabu

luagu bererun le richabei.

63 Hamadañadina ha inebehabubaña bun

hama ha agunfulirubalin bugumadin.

64 Nabureme, buin liña múa lau bínsiñehabu,

arufudabéi bilurudun nun!

Tet

65 Nabureme, óusera baali bubuein le buidu

kei füramase bani.

66 Ruba lichú aau nun luma subudi,

ladüga hemenigitina luagu bugumadin.

67 Lubaragiñe buga nǘnabudagüdüniwa,

adügatina saragu wuribati,

gama lumoun guentó ñǘdüntina lau le bubeibei.

68 Buítibu ani adüga bumuti giñe buiti;

arufudahabei bilurudun nun!

69 Rútiña wuribatiña nidurun madurunga au houn,

gama lumoun gúnfuli numuti bugumadin tau sun nanigi.

70 Darugu liña hasaminan,

anhein au, gúndaatina lau barufudahan.

71 Buiti ladüga nǘnabudawagüdüniwa nun,

ladüga ítara furendei numuti bilurudun.

72 Gebegitimati barufudahan nun

sügǘ lau milu seinsu le golu luma pülata.

Yod

73 Buguya guánarügü adügübalina,

ruba lichú aau nun lun gunfuranda nani bugumadin!

74 Hagundaaruba ha hínsiñehabubaña bun lau harihinina,

ladüga ru naali nemenigin luagu bererun.

75 Nabureme, subudi numuti luagu richá lan bererun,

ani luagu giñe richá ban dan le nidiherigüdabánina.

76 Seriwilá bínsiñehabu nun kei gurasu,

kei le aubei füramase bani nun!

77 Arufudabéi bareini nun, ani gabagarigüdabana,

ladüga gúndaati nasandiragun nungua lau barufudahan.

78 Barǘ hamá wuribatiña busiganu,

ladüga rútiña nidurun mébunouga,

busentina nasaminarun luagu barufudahan.

79 Ñübuin hamá ha hínsiñehabubaña bun numoun,

ha subudihabúbaña lun bugumadin.

80 Harumatá nanigi le gumuti lidan bilurudun,

ua láamuga ni kata uáguti nanüga busiganu.

Caf

81 Agurabatina lau mágüdahaü lun besefurunina;

ru naali nemenigin luagu bererun!

82 Buchá luagu nagu ayahua, agurabahei le füramase bubéi,

nálügüdaguati nungua: «Ídaba san biabin ámalihana?»

83 Lau sun aban lan weiriei mutu móuniti au ani bulíeiwaali,

mabulieidagungidina luéi bilurudun.

84 Átiribei san dan nagurabahan lanwoun le?

Ídaame san baguseragüdaña ha éibaahabalina?

85 Gürigia wuribatiña ha mafalarunbalin barufudahan,

achíahaaña huyu lidan némeri.

86 Íderaguabana, ladüga éibaahouatina mébunouga.

Richati sun bugumadin!

87 Ítagaraü yebe nafarúniwa hilagubei,

gama lumoun mígirun nágili barufudahan.

88 Ruba ibagari nun le úaraguati luma bínsiñehabu,

ábame nagunfuliruni bugumadin.

Lámed

89 Nabureme, magumuchaditi bererun;

derebuguhali bererun sielu!

90 Magumuchaditi bigunfulin

derebugugüda bumuti múa,

aba lerederun lara.

91 Sun katei laramémegili kei bariñaguni,

ladüga sun ligía leseriwiduña bun.

92 Lun hamuga manügün lan barufudahan ugundani nun,

gumuhali hamuga íruni nau.

93 Mabulieidúndügü nubéi barufudahan,

ladüga luéigiñe bíchiga ibagari nun.

94 Sefubána, ladüga bani au

ani falá naali bugumadin!

95 Hagurabahañein wuribatiña oura lun hagünrinchagunina,

gama lumoun téniñuniña lun bugumadin.

96 Ariha naali luagu gébeha lan sun katei,

ánheinti bugumadin mébehati.

Mem

97 Wéiriti línsiñe barufudahan nun!

Sun weyu nau asaminara luagun!

98 Nani bugumadin lun súnwandan;

chúgüdaali nau hawéi náganiñu.

99 Gunfurandatina sügǘ hau sun numaisturungu

ladüga saminatina saragu luagu bugumadin.

100 Gunfurandatina sügǘ hau wéiyaaña mutu

ladüga ñǘdüntina lau barufudahan.

101 Dísegüda naali nugudi luéi sun luriban üma

lun nagunfuliruni bererun.

102 Madireirúngidina luéi bererun,

ladüga buguya arufudahabei nun.

103 Bímetimati füramase ban lun nagülerugu

sügǘ lau sírudu niyumulugu.

104 Daritina gunfurandaü lidan bugumadin;

ligía liyereegunbei sun luriban usa nun.

Nun

105 Igemeri bererun lun nugudi,

larugounga ligía lun némeri.

106 Adügatina aban áfiñuruni ani nagunfulirubei:

Nadügübei le bubeibei!

107 Nabureme, nidiheriti nasandiragun nungua;

ruba ibagari nun kei füramasebani!

108 Resibibéi lidewese niyuma Nabureme,

arufudahabei bererun nun.

109 Súnwandan lídanñadina lan denchaü lánina óunweni,

gama lumoun mabulieidaguntina luéi barufudahan.

110 Sétitiña salufuritiña sádara nubá,

gama lumoun madiñutina luéi bugumadin.

111 Bugumadin nalagantebei lun súnwandan,

ladüga ligía agundaaragüdübarun nanigi.

112 Rúguaadina nungua tau sun nanigi

lun nagunfuliruni bilurudun,

lun súnwandan darí lumoun lagumuhóun.

Sámej

113 Iyereegutiña gürigia biangua tigibu nun,

gama lumoun hínsiñeti barufudahan nun.

114 Buguya naramudaguagülebei ani góunigibana;

ru naali nemenigin luagu bererun.

115 Dise humá nuéi salufuritiña huguya le,

ladüga busentina nagunfuliruni lugumadin Nubungiute!

116 Ruba erei nun kei füramase bani, gabagari náamuga;

magidarabéi nemenigin nuéi!

117 Íderaguabana ábame gayara lan nesefurun;

ítara luba nagunfuliruni bilurudun súnwandan.

118 Mabahüdün bumutiña ha adiñurubaña luéi bilurudun,

ladüga málati hasaminan.

119 Sun wuribatiña ha ubouagubaña,

ítara haña bun kei ifei;

ligía línsiñebei bugumadin nun.

120 Adadagarati núgubu lau anufudei bigibugiñe;

inebeti bererun nun!

Ayin

121 Mígirunñaha nágili nadügüni le richabei;

mígirabana háhaburugu ha adiheridagüdübadina.

122 Füramasebá nun bíderagubadina lan,

móuseragua hamana wuribatiña.

123 Buchá luagu nagu ayahua aguraba besefurunina,

aguraba basalbarunina kei füramase bani.

124 Óuserabana lau ligaburi bínsiñehabu,

arufudahabei bilurudun nun!

125 Bubuein au.

Ruba gunfurandaü nun,

ladüga busentina nasubudiruni bugumadin.

126 Aburemei, chülüha dan lun badügün somu katei,

ladüga rúhaña mebereseni lun bugumadin.

127 Ligía línsiñebei bugumadin nun

sügǘ lau golu fínuti.

128 Ligía nafalarunbalin bugumadin,

iyereegu ligía sun luriban óuseruni nun.

Pe

129 Buíduburiti bugumadin;

ligía nagunfulirunbalin.

130 Harugoungadagüdati lanichigu bererun,

arufudaha ligía houn gürigia ha lóuguati hanichigu.

131 Wagatina lau óunwenbu ayumahani,

ladüga ayumaha numuti bugumadin.

132 Arihabána, gudeme nan bun,

kei badüga houn ha hínsiñehabubaña bun.

133 Éibugagüdabana ítara kei füramase bani;

mígiraba lun lagumadirunina wuribani.

134 Sefubána luéi hanarime gürigia,

ladüga busentina nagunfuliruni bugumadin.

135 Arihabána lau lubuidun agu,

ani arufudahabéime bilurudun nun.

136 Furiti águiraü nágurugugiñe kei duna,

ladüga minebenwa lan barufudahan.

Tsade

137 Aburemei, richatibu;

úaraguati bererun.

138 Sun bugumadin richati,

ani inarüniti giñe.

139 Lagumuchaguagüdüñadina emeidini

le nasandirubei luagu bererun,

ladüga bulíeiguaaña náganiñu luéi.

140 Chóuruti liderebugu bani füramasei,

ligía línsiñebei nun.

141 Ni kátañadina, mabahüdǘn au,

gama lumoun mabulieidaguntina luéi bugumadin.

142 Súnwandan úaragua lan baguseragüdün,

ani inarüniti barufudahan.

143 Dariguaadina nungua lidan lidere dan luma idiheri,

gama lumoun gúndaaguagüda lumutina bugumadin.

144 Richati bugumadin súnwandan;

ruba gunfurandaü nun gayara láamuga nabagaridun!

Qof

145 Nabureme, wátina bun tau sun nanigi;

óunababana, ladüga busentina nagunfuliruni bilurudun!

146 Buguya náwarubei;

íderaguabana, gúnfuli náamugei bugumadin.

147 Lubaragiñe larugadun,

saratina amuriahei bídehan;

ru naali nemenigin luagu bani füramasei.

148 Rédeitina marumugunga sun áriebu

lun nasaminarun luagu bererun.

149 Nabureme, aganbabéi numalali luagu bínsiñehabu;

ruba ibagari nun según biricha.

150 Yarafatiña ha éibaahabalina nun,

ani dísetiña luéi barufudahan.

151 Buguya Aburemei, yarafañubiña,

ani sun bugumadin inarüniti.

152 Lúmagiñe binarü nasubudirei bugumadin,

le bíchugubei lun súnwandan.

Resh

153 Arihabéi nidiheri ani sefubána,

mabulieidagungidina luéi barufudahan.

154 Ageindaguabei nikesin, sefu báname;

ruba ibagari nun ítara kei füramase bani!

155 Díseti bídehan hawéi wuribatiña,

ladüga mafala hamani bilurudun.

156 Nabureme, wéiriti bareidun;

ruba ibagari nun según biricha.

157 Gíbetiña náganiñu hama éibaahatina,

gama lumoun madiseduntina luéi bugumadin.

158 Manaaguntina nungua hama ha gagarabaaguadibaña houn amu,

ha mídinbaña lau le lubeibei bugumadin.

159 Nabureme, arihabá lueirin línsiñe bugumadin nun,

ruba ibagari nun, luagu bínsiñehabu!

160 Lídanñein bererun inarüni;

magumuchaditi sun lúaran bererun.

Shin

161 Éibaaha hamutina wügüriña gabafutiña mébunouga;

gama lumoun inebeti bererun tun nanigi.

162 Gúndaatina lau le füramase bubéi,

kei le adariruti aban óunwenbu irisini.

163 Iyereeguti marasualugu nun, mawandun numuti;

gama lumoun hínsiñeti barufudahan nun.

164 Eremuhatina bun súnwandan,

luagu lúaragun bererun.

165 Wéiriti darangila hamá ha hínsiñehabubaña lun barufudahan,

ani úati lunti léiguadagüdüniña.

166 Nabureme, agurabatina besefurunina,

ladüga adüga naali bugumadin.

167 Ñǘdüntina lau le bubeibei,

ani hínsiñeti bugumadin nun tau sun nanigi.

168 Gúnfuli numuti barufudahan luma bugumadin;

subudi bumuti sun nóuserun!

Tav

169 Chülüla nagúaragun biñuarün Nabureme,

ruba gunfurandaü nun ítara kei füramase bani!

170 Chülüla nafurieidun biñuarün;

sefubána kei le aubei füramase bani!

171 Furila eremuhani niyumulugugiñe,

ladüga arufudaha baali bilurudun nun.

172 Wala niyuma aban uremu luáguti füramasei,

ladüga richati sun bugumadin.

173 Aranseñulá búhabu lun líderagunina

ladüga himei naali bugumadin.

174 Nabureme,

busentina lun besefurunina!

Gúndaati nasandiragun nungua lau barufudahan!

175 Busentina nabagaridun lun nalawahanibu;

íderagualana biricha.

176 Yuriguaadina keisi aban mudún;

higabu báluahana,

ladüga mabulieidagungidina luéi bugumadin!