1 Nabureme, le óunigirubalina, bun nagúara,

mamaharabá lun bóunabunina!

Ladüga ánhabu amahara bóunabunina,

gayaraahali níchaagun nungua

kei aban hádangiñe ha hilaañabaña.

2 Aganbabéi nagúarahan amuriahei bídehan,

dan le narufuduni núhabu tuagun buban to sánduboun.

3 Madurugudabana úara hama salufuritiña,

mabahüdabana hadan wuribatiña

ha gamadounbaña bóugudigiñe habiti

anhein múnadagiñe habiti wuribani hagía.

4 Rubei le hadünabei houn

le lafayeiruaha luriban hóuserun;

fáyeibaña lau guánarügü wuribati le hadügübei.

5 Kei meberesenhaaña lubéi

lau burí katei le ladügübei Aburemei;

günringualaña Aburemei,

lun másaaragüdündigia lániña!

6 Alawahoualá Aburemei,

le aganbubalin nayumuragun!

7 Nabureme nérebei, le óunigirubalina;

luagu temenigida nanigi ani íderagua lumutina.

Gúndaatu lubeiti nanigi;

neremuhaba, ru aume seremei lun Nabureme.

8 Aburemei éreibei houn lumutuniña;

ligía ídemueibei ani aramudaguagülei

lun urúei le lanúadirubei.

9 Sefubáña bánigu Nabureme,

binibaña ha bánigubaña.

Góunigibaña kei aban hóuniri mudún;

barübaña barünarugu lun súnwandan!