Salmos 24

Lurúeite uéiriguni

1 Lani Aburemei sun ubóu,

lau sun le lídanbei,

lau sun le wínwanbei lidan.

2 Ladüga Aburemei lan íchugubalin lebu ubóu,

aba lederebudagüdüni ligibuagu barana luma duna.

3 Ka gayaraabei lamudeirun luagun luwübüri Aburemei?

Ka gayaraabei lerederun tidan luban to sánduboun?

4 Lamudeiruba le úabei figóu lidan libagari,

ni lidan lisaminan;

le máhuduragunbei houn guáriua,

máfiñurun ligía lau marasualugu.

5 Aburemei le Lubungiute gürigia ligía,

labinirubei, ru ligíame irichaü lun.

6 Lunti ítara hamá ha áluahabalin Aburemei,

ha áluahabaña lun liñúarü hamá Lubungiute Hakobu.

7 Daragualá burí bena!

Rédeila burí hunreñu sunsuinagubei,

belu láamuga lurúeite uéiriguni!

8 Katei san lurúeite uéiriguni le?

Aburemei, le Hérebei, le Manufudebei!

Aburemei le manufudebei lidan wuribu!

9 Daragualá burí bena!

Rédeila burí hunreñu sunsuinagubei,

belu láamuga lurúeite uéiriguni!

10 Katei san lurúeite uéiriguni le?

Aburemei, le Súntibeigabafu

ligía lurúeitebei uéiriguni.