Salmos 30

Alawahani le lánina eteingiruni lun Aburemei

1 Nabureme alawaha numutibu,

ladüga sefu bumutina,

lugundun mígiruntibu lun héherahan náganiñu nau.

2 Nabureme, Nubungiute,

amuriahatina buma lun bíderagunina,

aba bareidaguagüdünina;

3 sefu bumutina lídangiñe óunweni;

rútibu ibagari nun,

sefu bumutina luéi nounwen.

4 Huguya le gúnfulibei luma Aburemei,

wa humá uremu lun!

Heremuha lun liri le sándubei!

5 Ladüga murusunrügüñein dan lau lidan ligañi,

ánheinti lareini durati lun súnwandan.

Ánhawa ayahua guñoun,

gúndaabadiwa larugan binaafin.

6 Chóuruguati nasandiragun nungua

aba nariñagun núnguarügü:

«Úabei ni kata ábürügüdütina».

7 Nabureme, derebugugüda bumutina

lidan fulasu chóuruti lau bareini.

Gama lumoun lidan bumahan bíderagunina,

aba labulieidaguagüdünina anufudei.

8 Bun nagúaraha Nabureme,

bun giñe nebegira:

9 Nabureme ka san agañeirunibei lau nounwen,

lau nanügǘn abunúa?

Malawahan lubadibu le hilaalibei;

madimurehan ligíame luagu búaragun.

10 Nabureme, aganbabána,

gudemená bun; Nabureme,

íderaguabana!

11 Sansi baali nayahun lun abinahanime,

gidaba niludun nuéi,

dáüguagüda báadina daüguaü to lánina fedu.

12 Ligía siñá lubéi nerederun maniñu Nubungiute,

náwaruba uremu bun, neteingirubadibu súnwandan!