സങ്കീർത്തനങ്ങൾ 43

എന്‍റെ പ്രത്യാശ

1 ദൈവമേ, എനിക്ക് ന്യായം നടത്തി തരേണമേ;

ഭക്തികെട്ട ജനതയോടുള്ള എന്‍റെ വ്യവഹാരം നടത്തേണമേ;

വഞ്ചനയും അനീതിയുമുള്ള മനുഷ്യരിൽനിന്ന് എന്നെ വിടുവിക്കേണമേ.

2 അവിടുന്ന് എന്‍റെ ശരണമായ ദൈവമാണല്ലോ;

അവിടുന്ന് എന്നെ ഉപേക്ഷിക്കുന്നതെന്ത്?

ശത്രുവിന്‍റെ ഉപദ്രവം മൂലം ഞാൻ ദുഃഖിച്ച് നടക്കേണ്ടിവരുന്നത് എന്തുകൊണ്ട്?

3 അവിടുത്തെ പ്രകാശവും സത്യവും അയയ്ക്കേണമേ;

അവ എന്നെ നടത്തട്ടെ;

അവിടുത്തെ വിശുദ്ധപർവ്വതത്തിലേക്കും

തിരുനിവാസത്തിലേക്കും അവ എന്നെ എത്തിക്കട്ടെ.

4 ഞാൻ ദൈവത്തിന്‍റെ യാഗപീഠത്തിലേക്ക്,

എന്‍റെ പരമാനന്ദമായ ദൈവത്തിങ്കലേക്ക് ചെല്ലും;

ദൈവമേ, എന്‍റെ ദൈവമേ,

കിന്നരം കൊണ്ടു ഞാൻ അങ്ങയെ സ്തുതിക്കും.

5 എന്‍റെ ആത്മാവേ, നീ വിഷാദിച്ച് ഉള്ളിൽ ഞരങ്ങുന്നത് എന്തിന്?

ദൈവത്തിൽ പ്രത്യാശ വെക്കുക;

അവിടുന്ന് എന്നെ രക്ഷിച്ച് പ്രകാശത്തിലാക്കുന്ന എന്‍റെ ദൈവമാകുന്നു

എന്നു ഞാൻ ഇനിയും അവിടുത്തെ സ്തുതിക്കും.