സങ്കീർത്തനങ്ങൾ 55:6,12-14,21,22

Em outras traduções

1. MAL Bíblia Sagrada Malaiala 1910 - Revisada (Escrita Contemporânea)

   6 പ്രാവിന്നുള്ളതുപോലെ

   എനിക്കു ചിറകുണ്ടായിരുന്നുവെങ്കിൽ!

   എന്നാൽ ഞാൻ പറന്നുപോയി വിശ്രമിക്കുമായിരുന്നു എന്നു ഞാൻ പറഞ്ഞു.

   12 എന്നെ നിന്ദിച്ചതു ഒരു ശത്രുവല്ല; അങ്ങനെയെങ്കിൽ ഞാൻ സഹിക്കുമായിരുന്നു;

   എന്റെ നേരെ വമ്പു പറഞ്ഞതു എന്നെ പകെക്കുന്നവനല്ല;

   അങ്ങനെയെങ്കിൽ ഞാൻ മറഞ്ഞുകൊള്ളുമായിരുന്നു.

   13 നീയോ എന്നോടു സമനായ മനുഷ്യനും എന്റെ സഖിയും

   എന്റെ പ്രാണസ്നേഹിതനുമായിരുന്നു.

   14 നാം തമ്മിൽ മധുരസമ്പർക്കം ചെയ്തു

   പുരുഷാരവുമായി ദൈവാലയത്തിലേക്കു പോയല്ലോ.

   21 അവന്റെ വായ് വെണ്ണപോലെ മൃദുവായതു;

   ഹൃദയത്തിലോ യുദ്ധമത്രേ.

   അവന്റെ വാക്കുകൾ എണ്ണയെക്കാൾ മയമുള്ളവ;

   എങ്കിലും അവ ഊരിയ വാളുകൾ ആയിരുന്നു.

   22 നിന്റെ ഭാരം യഹോവയുടെമേൽ വെച്ചുകൊൾക;

   അവൻ നിന്നെ പുലർത്തും;

   നീതിമാൻ കുലുങ്ങിപ്പോകുവാൻ അവൻ ഒരുനാളും സമ്മതിക്കയില്ല.

2. OMCV Versão Contemporânea Aberta em Malaiala

   6 ഞാൻ പറഞ്ഞു: "ഹാ, പ്രാവിനെപ്പോലെ എനിക്കു ചിറകുകൾ ഉണ്ടായിരുന്നെങ്കിൽ!

   ഞാൻ ദൂരെ പറന്നുപോയി വിശ്രമിക്കുമായിരുന്നു.

   12 എന്നെ അധിക്ഷേപിക്കുന്നത് ഒരു ശത്രുവാണെങ്കിൽ

   അതു ഞാൻ സഹിക്കുമായിരുന്നു;

   ഒരു വൈരി എനിക്കെതിരേ ഉയർന്നുവരുന്നെങ്കിൽ

   എനിക്കോടിമറയാൻ കഴിയുമായിരുന്നു.

   13 എന്നാൽ എന്റെ സഹചാരിയും എന്റെ ഉറ്റ സുഹൃത്തും

   എന്നോടു സമനായ മനുഷ്യനുമായ നീയാണല്ലോ അതു ചെയ്തത്,

   14 ഒരിക്കൽ ദൈവാലയത്തിൽവെച്ച്

   നിന്നോടൊപ്പം ഹൃദ്യസമ്പർക്കം ആസ്വദിച്ചിരുന്നു,

   അവിടെ ജനസമൂഹത്തോടൊപ്പം

   നാം ഒരുമിച്ച് നടന്നുപോയപ്പോൾത്തന്നെ.

   21 അവരുടെ ഭാഷണം വെണ്ണപോലെ മാർദവമുള്ളത്,

   എന്നിരുന്നാലും അവരുടെ ഹൃദയത്തിൽ യുദ്ധമാണുള്ളത്;

   അവരുടെ വാക്കുകൾ എണ്ണയെക്കാൾ മയമുള്ളത്,

   എന്നിട്ടും അവർ ഊരിയ വാളുകൾതന്നെ.

   22 നിന്റെ ഭാരം യഹോവയുടെമേൽ സമർപ്പിക്കുക

   അവിടന്നു നിന്നെ പുലർത്തും;

   നീതിനിഷ്ഠർ നിപതിക്കാൻ

   അവിടന്ന് ഒരിക്കലും അനുവദിക്കുകയില്ല.