Yaa Lɛsaatofo Niewo Ni Nimu Ku Kanyu
1 O Saate, fatoowolaa mi kamɛ
feetofo mi kafɔɔ.
2 Faye obe wɔ ninsiɛ ni, ku obe wɔ nintaka nii;
faye disibu nii di kakyonkɔ.
3 Fantofo odiebee nii ku otembee nii;
faye sisuku nii simuu.
4 Fiɛ di ɔlaa kamatika ni di ɔkplalomii nii suoto yi,
O Saate, faye nwu omuu.
5 Fɛɛmana mi feekyi- sitũ ku sɛmaa;
feetika kɔnɛɛ lɛfɔ di suoto nii.
6 Lɛsaatofo le mmle lɛtɛ diɛbla mi ɔkpɛ,
diɛtɛ diɛtaka katoo dilenke lɛsɔnu nii.
7 Ɔfɛ kakyɛ nfe di Ninwuna lɛfɔ katũ?
Ɔfɛ katoso nfe di anu lɛfɔ?
8 Nse lɛkata lesifi osi, fakpe ninfa;
nse lɛtɛ atensaa nii di nkyofokɔ, fakpe ninfa.
9 Nse lɛtaka lɛflɛlɛtɛ ku kolesɛtũ afoko,
nse lesiɛ di lekpo ɔlɔɔkɔ fanfa,
10 bia nfa kɔnɛɛ lɛfɔ kamatuo mi osuku,
koletanɛɛ lɛfɔ kamamufũ mi kpinkpĩ.
11 Nse lebuɛ nlɛ, "Nwaako ditunu kamawofasa mi
di lɛkpa kafɔɔ lekple kakyɛ diɛmana mi diekyi,"
12 bia ditunu dilɔbawɔfɔ dita fɔ;
kakyɛ kamakpa fɛle kakũ,
diekye ditunu nte fɛ lɛkpa diɛta fɔ.
13 Diekye afɔ niabla suoto nii kamɛ asaa;
afɔ nialoso mi faasiisa di yaami olofofɔtɔ kamɛ.
14 Kɔtansa fɔ diekye fɛɛbla mi di lɛyɛkɛ le niɛbla ni ɔkpɛ kamɛ;
sɛkpɛ lɛfɔ lɛbla ɔkpɛ,
n-ye nya amuu nwaa.
15 Akufi nii ditale fɔ lewofasaa
di obe wɔ baabla mi ni di kawofakɔ.
Obe wɔ baaloso mi baakyasa ni di kasɔ nwu kakyofokɔ,
16 anu lɛfɔ lanya suoto nii se manadibla nii.
Ayi amuu fɛɛtɛɛ nii
faakpana nya faakpee di kukũ lɛfɔ kamɛ
di obe wɔ di kuonwii lɛma ditawɛ nii.
17 O Yaa, mmle di disibu lɛfɔ lefũ mi ni kɔya!
Mmle di lɛpɔ lɛma nte ni!
18 Nse alɛ nka ma,
babalenkee ɔtɛnsia.
Nse lɛsɛnkɛ,
ɔkyɛ lɛfɔ lekple nkpe.