1 O Saate, matakatɛsa fɔ katoo,

diekye afɔ niadiki mi di dibiɔ kamɛ

ni fananta kafɔɔ suoto siyɔɔ balo nii di suoto nii nɛ.

2 O Saate, Yaa nii, lalɛɛ fɔ nlɛ kyakaakoe

ni faakya mi ofiɛ nɛ.

3 O Saate, faadiki mi faakyeko ɔkya kamɛ;

faafũ mi nkpa alɛ ntabuo di dibiɔ kamɛ.

4 Bisa sinu bita Saate nwu, aye ba ninle ni baklekletɛ nɔɔ;

bitansa leyooto klekle nɔɔ.

5 Diekye ɔblɔ nɔɔ ninklɛ ku ɔyɔɔ,

kafɔɔ sibualɛ nɔɔ nkpe diesifi ni nkpa mmuu kamɛ;

kaku owi nfuo ɔwɛ ku kakyɛ,

kafɔɔ suoto lɛyɔɔ nwa ku olesɛ.

6 Obe wɔ di asaa lalɛ mi ni ɔkyɛ, labuɛ nlɛ,

"Namakpankpa diidii."

7 O Saate, obe wɔ faale mi ni sibualɛ,

faata kobokote nii layila kpinkpĩ;

kafɔɔ obe wɔ faawofasa ni anu lɛfɔ,

lɛyɛkɛ lapɛ mi.

8 O Saate, afɔ lalɛɛ;

Saate nwu lawi lakpee nlɛ anyɛɛ nyaami:

9 "Lɛmɛmbiene ninsi di kawɔɔ nii kamɛ,

di ami dibiɔ osifi kamɛ?

Kudu nimatansa fɔ?

Kubayie onukwale lɛfɔ lɛkya?

10 O Saate, nu, faanyɛɛ nyaami kafɔɔ;

O Saate, le kyakakotɛ nii."

11 Faamunikĩisa kaku nii owi faabla katũ;

faadiki kaku dibula nii di suoto, ni faayɔ suoto lɛyɔɔ faanyukũsɛɛ nɛ,

12 alɛ otu nii kasa sinu anta fɔ alɛ kulaalo kanana.

O Saate, Yaa nii, kamapɛ fɔ sɛfa dinaa ni kaloo.