Salmos 65

Gadünati Bungiu lalawahóuniwa

1 Lubungiute Sión,

gadünatibu balawahóuniwa!

Yuuti lun lagunfulirúniwa füramasei bun

2 ladüga aganba bumuti afurieiduni!

Ñǘbuintiña sun gürigia bumoun.

3 Héreti wariban sügǘ wau,

gama lumoun feruduna bumuti wafigoun.

4 Fuleseiwatiña gürigia ha banúadirubaña

aba banügüniña aganóua bubadu,

tidan burí rumu to búbiñeboun.

Buíngüdabawa lau burí lubuidun-agei katei le búbiñebei,

lau burí abiniruni le tídanbei buban to sánduboun!

5 Bungiu wesefuragüle,

óunaba bumutiwa lau burí katei richati le badügübei;

hemenigitiña sun lílana ubóu buagu;

labu giñe barana le dísebei;

6 ágüdaha bumuti burí áraabu deregüdagu

lau bubafu luma bere.

7 Gáluma bumuti lahuuhan lugudi barana

luma hachagaragun gürigia;

8 íbini ha aganóubaña lidan fulasu díseti libiti ubóu,

adadagaratiña dan le harihini katei buíduburiti le badügübei;

wáguawati lau ugundani buagu

lúmagiñe aban louba ubóu lun luagun le aban.

9 Góunigi bumuti múa lau báhuyagüdün luagun;

aba babuiduragüdüni lun ábunaguni;

wéinamugüda bumuti lídibu türigu lau báturaguni.

Ítara liña baranseruni ichari!

10 Dǘdügüda bumuti múa,

buíngüdabei burí múa awouhóuaali lau duna;

ñulugüda bumuti lau huya gíbeti

biní bumuti burí le alubahóubei lídangiñe.

11 Buíngüda bumuti irumu lau abiniruni

gíbeti alubahani le líchugubei bareini;

12 íbini sagadi le lídanbei fulasu mageirawati hilumati

wende burí áraabu,

13 buin liña áraabu hau ibiñanigu,

anihein saragu türigu lidan fulasu wayati,

eremuhatiña súngubei agúaraha hagía lau ugundani!