Asaf onu. Kuɔta ni sinutuotɛ. Basa nwu di "Lili Kanya Ninii kanya"

1 O Israel Bafosokpatɛ, nu wo ɔlaa,

afɔ wɔ nialeko ni Yosef katũ fɛle foso;

afɔ wɔ nikole ni sɛka di bakerubim ntɛɛ, fɔɔkpa

2 di Efraim ku Benyamin ku Manase anu.

Sɛnkɛsa osie lɛfɔ;

faawa fabafũ wo.

3 O Yaa, kple fakpee wo osie;

ta anu lɛfɔ akpa akpete wo,

alɛ buawɛ didiki.

4 O Saate Yaa wɔ Ninlenke ni,

ɔmɛmbe di ɔblɔ lɛfɔ mafiɛ

di batii lɛfɔ ɔlaa ɔpɛ suoto kunaase?

5 Faata ma nnumɛɛ bloblo baale;

faata ma nnumɛɛ di lɛpɔ kamɛ baanyi.

6 Fatɔɔta wo buokple ditufa buɔta bawo loo,

balo loo kafɔɔ kɔma wo.

7 O Yaa, kple fakpee wo osie;

ta anu lɛfɔ akpa akpete wo,

alɛ buawɛ didiki.

8 Faakpaa awosobi kowoso faakyeko Egipte;

faatososa nnle, ni faasɔ kũ nɛ.

9 Faakpɛ kasɔ faatɛ kũ,

ni kuase odu kuayii kasɔ nwu nɛ.

10 Oyududu nikũ latĩi abokote

basedar kplɛ nwu ku sɛla nikũ.

11 Kuadiki ntɛɛ sɛla nikũ kuakpee di Lekpo nwu kamɛ,

ntaakɔ nikũ lalaadu bia Okle nwu.

12 Obe oso fatoobibiɛ siyoyiɛ ninwu

alɛ bamuu ba ninfe ninfa nsɛsɛɛ kũ abi?

13 Babeetũ di lepoo nlalaasa nya,

babɔkɛɛ di lepoo kafɔɔ nle kũ abi.

14 O Yaa wɔ Ninlenke ni, kple fawa ɔkyɛ loo!

Nyu fakyeko osi faanyu kasɔ!

Nyu awosobi kowoso ko mmle,

15 odu nwu di koletanɛɛ lɛfɔ lasɔ nii,

obisuɔtɔbi nwu faakaanasa faata ni suoto lɛfɔ.

16 Beebudi awosobi kowoso lɛfɔ nwu bɛɛtɛ kaasɔ, bɛɛfiɛ kũ ku ɔtɔ;

di ɔlaa lɛfɔ osĩ ɔta kamɛ batii lɛfɔ kokpi.

17 Ta kɔnɛɛ lɛfɔ kutika di otii wɔ di oletanɛɛkyɛ lɛfɔ suoto,

otii obisuɔtɔbi nwu faakaanasa faata ni suoto lɛfɔ.

18 Ni bulɔbakple busifi budiɛ fɔ;

sɛnkɛsa wo, ni bubalɛɛ leyooto lɛfɔ.

19 O Yaa, kple fakpee wo osie;

ta anu lɛfɔ akpa akpete wo,

alɛ buawɛ didiki.