Onu. Dawid onu.

1 O Yaa, otu nii ntoote;

Kamasa sinu ku ɔkla nii omuu.

2 Kyitaa ku sanku, bisɛnkɛ!

Kamasɛnkɛsa kolesɛtũ.

3 O Saate, kamatansa fɔ di nnle nwu kamɛ;

Kamasa sinu anta fɔ di batii nwu kamɛ.

4 Diekye lɛbɔmbɔ lɛfɔ lemuɔ, diɛtaka katoo dilenke osi;

onukwale lɛfɔ ndu kolo.

5 O Yaa, ta batakatɛsa fɔ katoo, balenkee osi,

faata kafɔɔ lɛkpa lɛfɔ ditĩi kasɔ nwu kamuu suoto.

6 Fũ wo faakyakaako wo kafɔɔ ku koletanɛɛ lɛfɔ,

alɛ faadiki mba fambɔmbɔ nii.

7 Yaa ntɔɔkakatɛ eekyeko kakleklekɔ nɔɔ:

"Di suoto lɛyɔɔ kamɛ kamasɛ Sekem

nsɛ kafɔɔ Sukot Ɔtaata nwu.

8 Gilead ole mi ale, Manase kafɔɔ ole mi ale;

Efraim ninle mi abɔɔsaa lekoto,

Yuda kayofo nii.

9 Moab ninle mi asaa ofoto bɛɛsi,

Edom ninfuki ntokota nii ntɛ;

Filisti suoto ninyiisa suoto lɛyɔɔ kudu."

10 Owe nimakpaa mi anwako okpoo wɔ beetofo oyoyiɛ beekyisa ni?

Owe nimaleko mi katũ ankyɛnko Edom?

11 O Yaa, diele afɔ nɛ, afɔ wɔ niasĩ wo ni

floosintikanko bakpɛtɛ loo kafɔɔ?

12 Ta wo lɛkyakaako di lo loo suoto,

diekye otii lɛkyakaako diele lɛsalɛsaa.

13 Ku Yaa bubawɛ lelenkee,

abananafu balo loo kafɔɔ antɛ kaasɔ.