Salmos 40

Katansa Onu

1 Latɛ suoto lasoko Saate nwu;

aakyi aanyu mi, ni aanu kaku nii kafɔɔ nɛ.

2 Aadiki mi aakyeko dibiɔ kplɔkplɔ kamɛ,

aakyeko apatapata ku dibuo kamɛ;

aayɔ nkpaa nii aase di difuɔnkpaa suoto

aatɛɛ kafɔɔ lɛba nwaa layila.

3 Aayɔ onu fɔle aakpee di kanya nii,

Yaa loo katansa onu.

Batii kpinwu kamanya manyɛkɛ

man-yɔ anu lɛma mantika di Saate nwu suoto.

4 Suoto siyɔɔ otii

wɔ niɛyɔ Saate nwu ɛɛbla ni anu ditikasaa nɔɔ,

anantikanko ni mba nintakatɛsa ni suoto katoo,

mamunikĩi mansifi ni balaatɛ afiɔ nfũ.

5 O Saate, Yaa nii, asaa kpinwu

ninle n-ya niɛbla ni ɔkpɛ fɛɛbla nii.

Asaa ya fɛɛbla fɛɛta wo nii

kuonwii dilaafuo nya ɔka ɔta fɔ;

nse nlɛ kɔkakatɛ ndiki nya mbuɛ kafɔɔ,

abasii ɔpɔ kabuɛ nii.

6 Fammbɔmbɔ oleɔta ku asaaɔta,

kafɔɔ feetikiti mi atoko;

floomiɛ

ofiɛ asaaɔta ku sikpile asaaɔta.

7 Ninfɛ labuɛ nlɛ, "Nyɛɛ, ntɔɔwa-

bɛɛkpana beekyeko suoto nii di kukũ nwu kamɛ alɛ,

8 O Yaa nii, komiɛ nlɛ mbla dibiesaa lɛfɔ;

kufiofa lɛfɔ nsi di otu nii kamɛ."

9 N-yie ɔsaabla tinini lɛkya di kasiisakɔ kplɛ nwu kamɛ;

nimmaasa anyasibi nii,

O Saate, fɛ mmle faye nii.

10 Ninwofasa ɔsaabla tinini lɛfɔ di otu nii kamɛ;

nkakatɛ di onukwale ku didiki lɛfɔ suoto.

Nin-yɔ lɛbɔmbɔ ku onukwale lɛfɔ nkookaa

kasiisakɔ kplɛ nwu.

11 O Saate, tansĩ mi nyaami lɛfɔ ɔnya;

ta lɛbɔmbɔ lɛfɔ ku onukwale lɛfɔ anyu mi obe lele.

12 Diekye sɛlaa se ninɔmafuo ni ɔka lɛmana mi siekyi;

sikpile nii ntoolenkee mi nnɛɛ, nioso noosinya.

Sipɔ silenke disi nii sinwini,

otu nii kafɔɔ kɔkpa kaamɛ nii.

13 O Saate, lekoto diki mi;

O Saate, wa wla fabakyakako mi.

14 Ta bakpee batii ba bamuu nikomiɛ alɛ boolo mi ni

sinunsɔ, baakpɔkpɔtɔ kafɔɔ;

ta mba bamuu nikomiɛ mi ni kawɔɔ

bakple nkpaamaa ku sinunsɔ.