भजन संहिता 101

वफादार ज़िन्दगी बीतानेरो फैसलो

दाऊदेरू भजन

1 अवं प्यार ते सच़्च़ेरू गीत ज़ोइलो;

हे यहोवा अवं सिर्फ तेरू भजन ज़ोइलो।

2 अवं अक्ली सेइं सही बत्तां च़लेलो।

तू मीं कां किताली एज्जेलो?

अपने घरे मां मेरो चाल चलन सच़्च़े दिले सेइं भोल्हो।

3 अवं बुरे गल्‍ली पुड़ अपनो मन न लेइलो।

अवं बुरी बत्तां च़लनेबालां केरे कम्मन सेइं नफरत केरताईं;

एरां कम्मां अवं न केरेलो।

4 झूठो दिल मीं करां दूर राए,

अवं बुरैई करां अनज़ान रेइलो।

5 ज़ै छ़ेपतां अपने पड़ोसेरी चोगली लाते,

तैसेरो अवं नाश केरेलो।

ज़ेसेरी एछ़्छ़ी च़ैढ़ोरी भोन ते ज़ेसेरो मन घमण्डीए तैसेरी अवं न झ़ैलेलो।

6 मेरी एछ़्छ़ी मुल्खे मां वफादार लोकन पुड़ लेगोरी रहेली ताके तैना मीं सेइं साथी रान,

ज़ै सही बत्तां च़लते, तैए मेरो सेवके।

7 ज़ै धोखो केरते, तै मेरे घरे मां न रेइ बटेलो,

ज़ै झूठ ज़ोते ते मेरे सामने खड़ो न रेइ बटे।

8 रोज़ झ़ेझ़ां अवं मुल्खेरे दुष्टां केरो नाश केरेलो,

ताके यहोवारे नगरेरे*101:8 यहोवारे नगरेरे यरूशलेम सब अनर्थ केरनेबालन नाश केरेलो।