Salmos 141

पाप ते पापी लोकन करां दूर रानू

दाऊदेरू भजन

1 हे यहोवा, अवं तींए फुकारने लगोरोइं; मीं कां लूशी एई!

ज़ैखन अवं तींजो आवाज़ देताईं, तू मेरी बिनती पुड़ ध्यान दे!

2 मेरी प्राथना तेरे सामने खुशबूदार धूपेरी ज़ेरि,

ते मेरे हथ फैलाने ड्लवझ़री अन्नबेलरे ज़ेरे भोन।✝141:2 प्रका. 5:8;8:3-4;कह. 3:25;1 पत. 3:6.

3 हे यहोवा, मेरे ऐशी पुड़ पहरो बिशाल,

मेरे ओठां केरि रखवाली केर।

4 मेरो मन कोन्ची बुरी गल्‍लरे पासे फिरने न दे;

एरू न भोए कि अवं अनर्थ केरनेबाले लोकन सेइं मिलतां

बुरे कम्मन मां शामल भोइ गेईं,

ते अवं तैन केरे खाने पीनेरी धामी मां भी शामल भोइ गेईं।

5 धर्मी लोक मीं मारेले त ई दया मन्नी गाली,

अगर तै मीं झ़िड़क दे त तै मेरे दोग्गेरे लेई तेल भोल्हो;

मेरो दोग एसेरो इन्कार न केरेलो,

दुष्ट लोकां केरे बुरां कम्मां केरे खलाफ अवं लगातार प्राथना केरतो रेइलो।

6 ज़ैखन दुश्मना केरे हाकिम तैस चट्टानी पुड़ेरां बिछ़ोड़े जे,

त तैखन तैनेईं मेरी गल्‍लां शुनी; किजोकि तैना बेड़ि रोड़ी थी।

7 ज़ेन्च़रे उडारे मां हल लाने सेइं ढैल्‍लां निस्तन,

तेन्च़रे इश्शी हेड्डी पातालेरे ऐशी मां खिलरोरीन।

8 पन हे यहोवा प्रभु, मेरी एछ़्छ़ी त तेरे पासे लेगोरिन;

ते अवं तेरी शरणी मां रहताईं; मीं मौतरे हवाले न केर।

9 मीं तैस फंदे करां, ज़ै तैनेईं मेरे लेई लेवरोए,

ते तैन अनर्थ केरनेबाले लोकन करां मेरी हिफाज़त केर।

10 दुष्ट लोक अपने ज़ालन मां एप्पु फसन,

ते अवं बेच़तां निस्सी गेईं।