1 हे यहोवा, हे मेरी ताकत, अवं तीं सेइं प्यार केरताईं।

2 यहोवा मेरी चट्टान, ते मेरो क़िलो ते मेरो छुटानेबालोए;

मेरो परमेशर, मेरी चट्टाने, ज़ैस पुड़ अवं भरोसो रखताईं।

तै मेरी ढाल ते मेरी मुक्तरू शिंग,

ते मेरो उच्‍चो क़िलोए।✝

3 अवं यहोवा ज़ै तारीफ़रे काबले तैस्से पुकारेलो,

एन्च़रे अवं अपने दुश्मन्न करां बच़ाव गालो।

4 मौतरी रेस्सन सेइं अवं च़ेवरे पासन घिरोरोईं,

ते अधर्मेरे सैलाबे सेइं मेरो दिल डेरि जेवरोए;✝

5 पातालेरी रेस्सी मेरे च़ेवरे पासन थी,

ते मौतरे फंदे मीं पुड़ एवरे थिये।

6 एपनी मुसीबती मां मीं यहोवा परमेशर पुकारो;

ते अपने परमेशरे कां मद्दतरे लेई मीं बिनती की।

तैनी अपने मन्दरे मां मेरी आवाज़ शुनी।

ते मेरी बिनती ज़ै तैस कां थी, तैसेरे कन्ने मां पुज़्ज़ी।

7 तैखन धरती हिल्‍ली जेई, ते थरथराने लगी,

ते पहाड़ां केरि मुनीयादां भी हिल्‍ली जेई,

किजोकि तै बड़ो क्रोधे भोवरो थियो।

8 तैसेरे नक्‍के मरां तू लगो निसने,

ते तैसेरे ऐशी मरां अग निस्तां भस्म केरने लगी;

ज़ैस सेइं मूरां धुखी जेआं।

9 अम्बरे झुकेइतां तै बांदो भोव, ज़ैखन तै उन्ढो ओस्सो;

त तैसेरे पव्वन हैठ बड़ू आंधरू थियूं।

10 तै करूबे* पुड़ सुवार भोइतां उडरो,

बल्के तै हवारे फंघेई सेइं उडरने लगो।

11 तैनी आंधरू अपनि छ़पनेरी ठार बनाई,

ते अपने च़ेवरे पासन अम्बरेरी कैली बिदलारां केरो डेरो बनाव।

12 तैसेरे अगरां बिजली सेइं,

आण ते अंगारां बिछ़ड़ां।

13 तैखन यहोवा अम्बरे मां गरज़ो,

ते परमप्रधान परमेशरेरी आवाज़ शुनोई ते आण ते मूरां भेज़ां।

14 तैनी अपने तीर च़लेइ-च़लेइ दुश्मन तितर-बितर किये;

ते अम्बरेरी बिजली बिछ़ोड़ी-बिछ़ोड़ी तैना हाराए।

15 तैखन पैनेरो थलो लेइहोव, ते दुनियारी बुनियादां बैंदी भोइ,

ई त यहोवा तेरी डांटी सेइं,

ते तेरे नक्‍केरे शाहेरे झोंकी सेइं भोवं।

16 तै उच्‍ची ठारारां उन्ढो अव, ते अवं ट्लेइ छ़डो,

अवं डुग्घे पैनी मरां केढतां बेइर आनो।

17 तैनी अवं मेरे ताकतबर दुश्मने करां,

ते तैन करां ज़ैना मीं सेइं नफरत केरतन,

अवं बच़ाव ज़ैन सेइं मेरी पेश न थी गाथी।

18 ज़ैस दिहैड़ी अवं मुसीबती मां फेसी जेव, तैस दिहैड़ी तैनेईं मीं पुड़ हमलो कमाव,

पन यहोवा मेरो सहारो थियो।

19 तैने अवं तंग ठारारां केढतां खुल्‍ली ठैरी मां पुज़व,

तैनी अवं छुटाव, किजोकि तै मीं पुड़ खुशी थियो।

20 यहोवा मीं सेइं मेरे धार्मिकतारे मुताबिक बर्ताव कियोरोए;

ते तैनी मेरे हथ्थां केरि शुद्धतारे मुताबिक

मीं बदलो दित्तोरोए।

21 किजोकि अवं यहोवारे बत्तन पुड़ च़लतो राव,

ते बुरैइारे वजाई सेइं अवं अपने परमेशरे करां दूर न भोव।

22 किजोकि तैसेरे सारे फैसले मेरे सामने बनोरो राए,

ते अवं तैसेरे नियमन करां दूर न भोव।

23 अवं तैसेरे सामने सच़्च़ो बनोरो राव,

ते अपनो आप अधर्मे करां बच़ेइतां रख्खो।

24 यहोवा मेरे धार्मिकतारे मुताबिक बदलो दित्तो,

ते मेरे हथ्थां केरि शुद्धतारे मुताबिक ज़ै तैसेरे सामने थी।

25 वफादारे सेइं साथी तू वफादार भोल्हो;

ते सच़्च़े मैन्हु सेइं साथी तू सच़्च़ो लेइहोतस।

26 शुद्धे सेइं तू अपनो आप शुद्ध हिरातस;

ते टारे मैन्हु सेइं साथी तू टारो बनतस।

27 किजोकि ज़ैना मुसीबतरे मारे आन, तू तैन बच़ातस;

पन घमण्डी लोकां केरि एछ़्छ़ी उन्ढी केरतस।

28 एल्हेरेलेइ कि तू मेरो दीयो बालतस;

मेरो परमेशर यहोवा मेरे आंधरे

ट्लेकड़ार बनाते।✝

29 किजोकि अवं तेरी मद्दती सेइं सेनाई पुड़ हमलो केरताईं;

ते अपने परमेशरेरी मद्दती सेइं अवं बेड़ि-बेड़ि दिवारां पार केरताईं।

30 परमेशरेरी बत सिद्धे;

यहोवारू वचन तेवरूए;

तै तैन सेभी केरि ढाले, ज़ैना तैस पुड़ भरोसो रखतन।

31 किजोकि यहोवारे अलावा होरो कौन परमेशरे?

ते इश्शे परमेशरेरे अलावा होरि कोई चट्टाने?

32 ई तैए परमेशरे, ज़ै शेक्ति सेइं मेरो कमरबन्ध बन्धते,

ते मेरी बत भी सिद्ध बनाते।

33 तैए मेरे पव हिरनरे ज़ेरे तेज़ बनाते;

ते मीं मेरी उच्‍ची-उच्‍ची ठैरन पुड़ पुज़ाते।

34 तै मेरे हथ्थन सेइं मीं जंग केरनी शिखालते;

एल्हेरेलेइ मेरी पाखड़न सेइं पितलरू धनुष झुकी गाते।

35 तीं मीं मेरी मुक्तरी ढाल दित्तोरीए,

ते तीं अपने देइने हथ्थे सेइं अवं सम्भालोरोईं;

ते तेरो अनुग्रह मीं महान बनाते।

36 तीं मेरे पव्वां केरे लेई ठार खुल्‍ली बनेवरीए;

ते मेरे पव नईं घिशकोरे।

37 अवं अपने दुश्मन्न पत्ती खेत्तां तैन ट्लालो;

ते ज़ांतगर तैना नाश न भोन वापस न एज्जेलो।

38 अवं तैन एरहो कोशेलो, कि तैना खड़े न उठी बटेले;

तैना मेरे पव्वन हैठ ढ्लेन्च़ोले।

39 किजोकि तीं जंगरे लेई मेरी कमरी मां

शेक्तरो पटको बन्धोरोए;

ते मेरे दुश्मन मेरे सामने तीं पस्त कियोरन।

40 तीं मेरे दुश्मना केरि पिठ मेरे पासे कियोरीए;

ताके अवं एप्पु सेइं बैर रखनेबालन नाश केरि सेखी।

41 तैन दुश्मनेईं मद्दतरे लेई बड़ी बिनती त की पन तैन कोई बच़ानेबालो न मैल्हो,

तैनेईं यहोवा कां भी बिनती की,

पन तैने भी तैन जुवाब न दित्तो।

42 तैखन मीं तैना मेड्डी-मेड्डी बाते सेइं

उडारेरी धूड़रे ज़ेरे किये;

मीं तैना बत्तरे च़िकरारे ज़ेरे केढतां शारे।

43 तीं अवं कौमां केरि लड़ैइन करां भी बच़ेइतां रख्खो;

ते तीं अवं गैर कौमां केरो प्रधान बनेइतां रख्खो;

ज़ैन लोकन अवं ज़ानतो भी न थियो

हुनी तैना मेरी सेवा केरतन

44 ज़ैना मेरू नवं शुन्तन तैना मेरो हुक्म मन्नेले;

परदेशी मेरे बस्से मां भोइ गाले।✝

45 परदेशी भी ढिल्‍ले भोइ गाले;

ते अपने क़िलन मरां थरकते निस्सन।

46 यहोवा परमेशर ज़ींतोए; मेरी चट्टान धने;

ते मेरे मुक्ति देनेबाले परमेशरेरू शुक्र भोए।

47 धने मेरो बदलो नेनेबालो परमेशर!

ज़ैनी मुल्खे-मुल्खेरे लोक मेरे कब्ज़े मां कियोरेन;

48 ते अवं मेरे दुश्मन्न करां छुटेइतां रखोरोइं;

तू मीं मेरे दुश्मन्न करां उच्‍चो केरतस,

ते ज़ालम मैन्हन करां बच़ाते।

49 एल्हेरेलेइ अवं कौमां-कौमां केरे सामने तेरू शुक्र केरेलो,

ते तेरे नंव्वेरू भजन ज़ोइलो।✝

50 तै अपने ठहरावरे राज़े महान ज़ींत देते,

तै अपने अभिषेक कियोरे दाऊदे पुड़

ते तैसेरे खानदाने पुड़ हमेशा दया केरतो रालो।✝