Salmos 20

ज़ींतनेरे लेई प्राथना

प्रधान बज़ानेबालेरे लेई दाऊदेरू भजन

1 मुसीबतरे दिहाड़े यहोवा तीं जुवाब दे!

याकूबेरे परमेशरेरू नवं

तीं बेड़ि उच्‍ची ठैरी पुड़ तेरी रक्षा केरे!

2 तै एपनी पवित्र ठारारां तेरी मद्दत केरे,

ते तै सिय्योने मरां तेरो सहारो बने!

3 तै तेरी सब च़ढ़तल याद रख्खे,

ते तेरी होमबलि कबूल केरे। (सेला)

4 तै तेरे दिलेरी इच्छा पूरी केरे,

ते तेरी सब योजना कामयाब केरे!

5 तैखन अस तेरी मुक्तरे*20:5 मुक्तरे ज़ींत वजाई सेइं उच्‍ची आवाज़ी मां

खुशी सेइं गीतां ज़ोमेले,

ते अपने परमेशरेरे नंव्वे सेइं झण्डे खड़े केरमेले।

यहोवा तेरी सैरी बिनती कबूल केरे।✝20:5 भज. 60:4.

6 हुनी मीं समझ़ू कि यहोवा अपने च़ुनोरे राज़े बच़ाते;

तै अपने पवित्र सुर्गे मरां,

अपने देइने हथ्थेरी मुक्तरे ताकती सेइं, तैस जुवाब देलो।

7 किछन अपने रथ्थन पुड़, ते किछ अपने घोड़न पुड़ भरोसोए,

पन अस त अपने यहोवा परमेशरेरू नंव्वे घिन्मेले।✝20:7 भज. 33:16-17.

8 तैना लोक त ठोकर खेइतां बिछ़ड़ी जे;

पन अस खड़े उठते ते सिद्धे खड़े अहम।

9 हे यहोवा, राज़े ज़ींत दे;

असन बच़ा; ज़ैस दिहैड़ी असां तीं पुकारमेले तैखन जुवाब देइयां।