1 यहोवा मेरी लौ ते मेरी मुक्ति आहे;

अवं कैस करां डेरि?

यहोवा मेरे ज़िन्दगरो मज़बूत क़िलो ठहरोरोए,

अवं कैस करां डेरि?

2 ज़ैखन बुरे लोक ज़ैना मीं सताते

ते मीं सेइं बैर रखते थिये,

ते मीं मारनेरे लेई कोशिश की,

तैखन तैन्ना ठोकर खेइतां बिछ़ड़ी जे।

3 चाहे सेना भी च़ेवरे पासन घेरो की न दे,

फिरी भी अवं न डरेलो; चाए मेरे खलाफ जंग की न भोए,

तैस हालती मां भी मेरो भरोसो परमेशरे पुड़ पक्‍को भोल्हो।

4 अक बर मीं यहोवा करां मगोरूए,

तैसेरे लेई कोशिश केरतो रेइलो;

कि अवं ज़िन्दगी भर यहोवारे भवने मां रेईं सेकी

ज़ैस सेइं यहोवारी महिमा पुड़ नज़र लेइतां रेखी,

ते तैसेरे भवने मां ध्यान केरतो रेईं।✝

5 किजोकि मुसीबतरे दिहाड़े तै मीं

अपने भवने मां बिशने देलो;

ते मीं अपने तेम्बु मां छ़पने देलो,

ते मीं चट्टानी पुड़ च़ाढ़ेलो।✝

6 हुनी मेरी क्रोड़ी मेरे च़ेवरे पासां केरे दुश्मन्न करां उच्‍ची भोल्ही;

ते अवं यहोवारे तेम्बु मां आनन्देरे बलिदान च़ाढ़ेलो;

ते अवं गीत ज़ोलो ते यहोवारी तारीफ़ केरेलो।✝

7 हे यहोवा, मेरि आवाज़ शुन, अवं बिनती केरेलो,

तू मीं पुड़ दया केर ते मीं जुवाब दे।✝

8 तीं ज़ोवरूए, "मेरे दर्शनेरे तोपी मां राथ।"

एल्हेरेलेइ मेरो मन तीं सेइं ज़ोते,

"हे यहोवा, अवं तेरे दर्शनेरो तलाशी मां रेइलो।"

9 अपनु तुत्तर मीं करां न छ़ुपा।

अपने दासे क्रोध केरतां न हटा,

तू मेरो मद्दत केरनेबालो बनोरो रा।

हे मेरे मुक्ति देनेबाले परमेशर मीं करां दूर न भो, ते मीं न शार!

10 मेरे अम्मा-बाजे त अवं शारोरोईं,

पन यहोवा मेरो खियाल रखेलो।

11 हे यहोवा, अपने बत्ती पुड़ च़लनू मीं शिखाल,

ते मेरे दुश्मना केरे वजाई सेइं मीं खुल्‍ली बत्ती पुड़ च़ला।✝

12 मीं मेरे सताने बालां केरि इच्छाई पुड़ न शार,

किजोकि झूठे गवाह ज़ैना ज़ुलम केरनेरी धुनी मां आन

मेरे खलाफ खड़े भेवरेन।

13 अगर मीं विश्वास न भोथो कि अवं ज़ींतां केरि

धेरती पुड़ यहोवारी भलियाई हेरेलो,

त अवं बेहोश भोइ गाथो।✝

14 यहोवारे इंतज़ारे मां रेइयां;

हिम्मत रख ते तेरो दिल मज़बूत राए;

हाँ, सिर्फ यहोवारो इंतज़ार केर!✝