परमेशरेरे तारीफ़रू गीत
1 हे धर्मी लोकव, यहोवारे वजाई सेइं जयजयकार केरा।
किजोकि धर्मी लोकन तारीफ़ केरनी शोभतीए।
2 सितार बज़ेइतां यहोवारू शुक्र केरा,
दश तारी बाली सारंगी बज़ेइतां
तैसेरू भजन ज़ोथ।33:2 इफि. 5:19.
3 यहोवारे लेई नंव्वू गीत ज़ोथ,
जयजयकारे सेइं रोड़ेच़ारे बज़ाथ।33:3 प्रका. 14:3.
4 किजोकि यहोवारू वचन सच़्च़ू आहे;
ते तैसेरां सब कम्मां बगैर तरफदैरी सेइं आन।
5 तैस धार्मिकता ते न्याय बड़ो ट्लारोए;
यहोवारे करुणाई सेइं धरती भरपूरे।
6 यहोवारे वचने सेइं अम्बर,
ते तैसेरे सारे तारे तैसेरे ऐशेरे
सांसी सेइं बने।33:6 इब्रा. 11:3.
7 तै समुन्दरेरू पानी ढेरेरू ज़ेरू अकोट्ठू केरते;
तै डुग्घे पैनी अपने भण्डारे मां रखते।
8 सारे दुनियारे लोक यहोवा करां डरन,
दुनियारे सब रानेबाले तैसेरो डर मन्न!
9 किजोकि तैनी ज़ेरू ज़ोवं त तैखने भोवं;
ज़ैखन तैनी हुक्म दित्तो,
त तैखन हकीकति मां सब किछ लेइहोने लग्गू।
10 यहोवा कौमां-कौमां केरि योजना
बेकार केरते;
तै मुल्खे मुल्खेरे लोकां केरे खियाल
बेफल केरते।
11 यहोवारी योजना हमेशा बनोरी राली,
तैसेरे मनेरे खियाल पीढ़ी-पीढ़ी
तगर बनोरे राले।
12 केत्रो धने तै राष्ट्र ज़ेसेरो परमेशर
यहोवा आहे
ते तैन समाज ज़ैन तैनी अपनो खास हिस्सो
भोनेरे लेई च़ुनोरू भोए!
13 यहोवा अम्बरे मरां नज़र केरते,
तै सेभी लोकन तकते;
14 अपने रानेरी ठारी मरां
तै धेरती पुड़ सब रानेबालन तकते।
15 तैए ज़ै सेभी केरे दिलन बनाते,
तै तैन केरे सेभी कम्मन पुड़ ध्यान देते।
16 कोई एरहो राज़ो नईं, ज़ै बड़ी
सेना भोनेरे वजाई सेइं बच़े;
बहादर अपने बड़े ताकतरे वजाई सेइं छुट्टी न सके।
17 ज़ींत हासिल केरनेरे लेई घोड़ो बेफैइदी हिफाज़ते,
तै अपने बड़े ताकतरे वजाई सेइं कोन्ची
न बच़ेइ सके।
18 हेरा, यहोवारी नज़र तैसेरो डर मन्ने बालन पुड़
ते तैन पुड़ ज़ैना तैसेरी करुणारी उमीद रखतन,
बनोरी रहतीए,
19 कि तै तैन केरि जान मौती करां बच़ाए,
ते काल पेनेरे वक्ते तैन ज़ींते रख्खे।
20 अस यहोवा बलगतम,
तै इश्शी मद्दत केरनेबालो ते इश्शी ढाल ठहरोरोए।
21 इश्शे दिल यहोवारे वजाई सेइं खुश भोल्हे,
किजोकि असेईं तैसेरे पवित्र नंव्वे पुड़ भरोसो रखोरोए।
22 हे यहोवा, ज़ेन्च़रे तीं पुड़ इश्शी उमीदे,
तेन्च़रे तेरी करुणा भी असन पुड़ भोए।