इस्राएलेरी शिकायत
साज़ बज़ानेबालां केरे प्रधानेरे लेई कोरह खानदानेरे लोकां केरो मश्कील
1 हे परमेशर, असेईं अपने कन्नेईं सेइं शुनू,
इश्शे दादे-पड़दादेईं असन सेइं बियान कियूं;
कि तीं तैन केरे दिहाड़न मां
ते पुराने ज़माने मां कुन-कुन कम्मां कियोरां थियां।
2 तीं एप्पु अपने हथ्थे सेइं कौमां केढी,
ते इना बसाए;
तीं मुल्खां-मुल्खां केरे लोकन दुख दित्तो,
ते च़ेवरे पासन फैलाए।
3 किजोकि तेरे लोक न त अपने तलवारारे
ज़ोरे सेइं इस मुल्खेरे मालिक भोए,
ते न अपने बड़े ताकती सेइं; पन तेरे देइने हथ्थे
ते तेरे पाखड़ ते तेरे खुशरे तुत्तरेरे वजाई सेइं तैनेईं ज़ींत हासिल की;
किजोकि तू तैन चाथो थियो।
4 हे परमेशर, तूए इश्शो महाराज़ो आस,
तू याकूबेरे छुटकारेरो हुक्म देतस।
5 तेरी मद्दती सेइं अस अपने दुश्मन्न
ज़मीनी पुड़ शैरी देतम,
तेरू नवं घिन्तां असां
अपने खलाफ भोने बालन ढ्लेन्च़ी देमेले।
6 किजोकि अवं अपने धनुषे पुड़ भरोसो न रेखी,
ते मेरी तलवार मीं न बच़ेइ सके।
7 बल्के तूए असन दुश्मन्न करां बच़ातस,
तूए तैन न उमीद ते शरमिन्दा केरतस
ज़ैना असन सेइं नफरत केरतन।
8 परमेशरेरी तारीफ़ असां
सैरी दिहैड़ी केरतम,
ते अस हमेशा तेरे नंव्वेरू
शुक्र केरते रहमेले। (सेला)
9 पन हुन्ना तीं असां रद कियोरेम,
असां शरमिन्दा कियोरेम,
ते इश्शे सेना सेइं साथी अग्रोवं न च़लन।
10 तीं असां दुश्मना केरे सामने पस्त भोने दित्ते,
ते ज़ैना असन सेइं नफरत केरतन तैनेईं असां लुट्टी छ़डोरेम।
11 तीं असां भैड्डां केरे ज़ेरे किसैईं
केरे हथ्थे मां दित्तोरेम,
ते अस गैर कौमन मां
तितर-बितर कियोरेम।
12 तू अपनि कौम मुफते मां बेच़तस,
तैन केरि कीमती सेइं तू धनी न भोस।
13 तू इश्शे पड़ोसन सेइं इश्शे
खलाफ ज़ोतस,
ते इश्शे च़ेवरे पासे रानेबाले
इश्शो मज़ाक बनातन।
14 तीं अस गैर कौमन
मां बेइज़्ज़त कियोरेम,
ते मुल्खां-मुल्खां केरे लोक44:14 मुल्खां-मुल्खां केरे लोक गैर कौमां केरे पड़ोसी लोक इश्शे
वजाई सेइं क्रोड़ी हिलातन।
15 सैरी दिहैड़ी मेरी बेइज़्ज़ती भोतीए,
ते कलंक लाने
ते निन्दा केरनेबालेरे गल्ली सेइं,
16 दुश्मन ते बदलो नेने बालेरे वजाई सेइं,
बुरू भलू ज़ोने बालां
ते निन्दा केरनेबालां केरे वजाई सेइं।
17 एन सब किछ असन पुड़
बीतू फिरी भी अस तीं न बिसरम,
न तेरे करारेरे बारे मां धोखेबाज़ी कियोरीए।
18 न इश्शे दिल तीं करां दूर भोए,
ते न इश्शे पव तेरी बत्ती करां बेइर भोए;
19 फिरी भी तीं असां गिद्दां केरि ठारी चूर-चूर किये,
ते तीं असां बड़े आंधरे मां छ़ुपेई छ़डे।
20 अगर असां अपने परमेशरेरू नवं बिसरेथे,
या अपने हथ प्राथनारे लेई कोन्ची होरि देबतेरे पासे खड़े केरम,
21 त कुन परमेशर एस गल्लरो खियाल न केरेथो?
किजोकि तै त मनेरी छ़ेपोरी गल्लां ज़ानते।
22 पन अस सैरी दिहैड़ी तेरे लेई
मारे गातम,
ते तैन भैड्डां केरे ज़ेरे समझ़े
गातम ज़ैना मारे गाने पुड़ आन।44:22 रोम. 8:36.
23 हे प्रभु, उठ! बींझ़! तू किजो झ़ुलतस?
उठ! असन हमेशारे लेई न शार!
24 तू अपनु तुत्तर असन करां छ़ुपेइतां किजो रखतस,
ते इश्शो दुख ते सताव गानू बिसरी गातस?
25 इश्शे प्राण मित्ती मां मिली जे;
ते इश्शी जान तल्ले सेइं मिली जेई।
26 खड़े उठतां इश्शी मद्दत केर।
ते अपने दयारे खातर असन बच़ा।