परमेशर इश्शी छ़पनेरी ठार
साज़ बज़ानेबालेरे प्रधानेरे लेई कोरह खानदानेरे लोकां केरू, अलामोतेरे रागे पुड़ अक गीत
1 परमेशर इश्शी छ़पनेरी ठार ते ज़ोरे,
मुसीबती मां बड़े आसैनी सेइं मैल्हने बालो मद्दतगारे।
2 एल्हेरेलेइ असन कोई डर नईं, चाए
ज़मीन उलटोई गाए,
ते चाए पहाड़ां समुन्दरे मां छ़डां गान;
3 चाए समुन्दर शोर सल्हतां ठाठां मारे,
ते पहाड़ां तैसेरी छ़ेलहन सेइं हिल्ली गान,46:3 लूक. 21:25;मत. 7:25. (सेला)
4 अक दरियाए ज़ेसेरी नेरहन सेइं परमेशरेरे
नगरे मां
मतलब परमप्रधान परमेशरेरे पवित्र रानेरे ठारी मां
आनन्द भोते।
5 परमेशर तैस नगरे मांए, तैन नगर कधे
टलने बालू नईं;
जल्दी परमेशर तैसेरी मद्दत केरते।
6 कौमां शोर मच़ाने लेग्गी, मुल्खे-मुल्खेरे
लोक डरने लगे;
परमेशरे आवाज़ दित्ती त ज़मीन गेली जेई।46:6 प्रका. 11:18;भज. 2:1.
7 सेनां केरो यहोवा असन सेइं साथीए;
याकूबेरो परमेशर इश्शो क़िलोए। (सेला)
8 एज्जा, यहोवारे महान कम्मन पुड़ नज़र देथ,
कि तैनी ज़मीनी पुड़ खतरनाक तुबाही
कियोरीए।
9 तैए दुनियारे आखरी तगर जंगां बंद केरते;
तै धनुष ट्लोड़ते, ते बलमी दूई टुक्ड़े केरते,
ते रथ्थन अग्गी मां फुक्की देते!
10 तै ज़ोते, "च़ुप भोइ गाथ, ते ज़ाना कि अव्वें परमेशर आईं।
अवं कौमन मां महान आईं,
अवं सारे दुनियाई मां महान आईं!"
11 सेनां केरो यहोवा असन सेइं साथी आहे;
याकूबेरो परमेशर इश्शो उच्चो क़िलोए। (सेला)