बत हिरानेरी प्राथना
प्रधान बज़ानेबालेरे लेई: बेंशोई बज़ेइतां दाऊदेरू भजन
1 हे यहोवा, मेरी गल्लन पुड़ ध्यान दे;
मेरे करलाने पुड़ ध्यान दे।
2 हे मेरे परमेशर राज़ा, मेरी बिनती पुड़ ध्यान दे,
किजोकि अवं तींए कां प्राथना केरताईं।
3 हे यहोवा, तू झ़ेज़्झ़ां मेरी प्राथनारी आवाज़ शुनेलो,
अवं झ़ेज़्झ़ां तीं कां प्राथना केरतां बलगतो रालो।
4 किजोकि तू एरहो परमेशर आस, कि ज़ै बुरैई सेइं खुशी न भोस;
बुरे लोक तीं सेइं साथी न रेइ सखन।
5 घमण्डी तेरे सामने खड़े न भोइ सकेले;
तीं सेभी बुरे लोकन सेइं नफरते।
6 तू तैन नाश केरेलो ज़ैना झूठ ज़ोतन;
यहोवा खून केरनेबालन ते धोखो देनेबालन सेइं नफरत केरते।
7 पन अवं त तेरी बड़ी दयारे वजाई सेइं तेरे भवने मां एज्जेलो,
अवं तेरो डर मेनतां तेरे पवित्र मन्दरेरे पासे मथ्थो टेकेलो।
8 हे यहोवा, मेरे दुश्मना केरे वजाई सेइं, एपनी धार्मिकतारे बत्तां मीं च़ला;
मीं अग्री-अग्री अपनि सिद्धी बत हिरा।
9 किजोकि तैन केरे ऐशी मां किछ भी सच़ नईं;
तैन केरे मने मां सिर्फ दुष्टे।
तैन केरू गल खुल्ली कब्रे,
तैना अपने ज़बानी सेइं मिट्ठी-मिट्ठी गल्लां केरतन।5:9 रोम. 3:13.
10 हे परमेशर, तू तैन दोषी ठहरा;
तैना अपने योजनान सेइं एप्पु बिछ़ड़न;
तैन केरे पापां केरे वजाई सेइं तैन बेइर केढी छ़ड,
किजोकि तैनेईं तेरे खलाफ बगावत कियोरीए।
11 पन तैना सब, ज़ैना तीं मां शरण नेतन, तैना सब खुश भोन,
तैना सदा ज़ोरे-ज़ोरे सेइं गीतां ज़ोंते रान; किजोकि तू तैन बच़ेइतां रखतस,
ते ज़ैना तेरे नंव्वे सेइं प्यार रखतन तीं मां खुश भोल्हे।
12 किजोकि तू सच़्च़े लोकन बरकत देलो; हे यहोवा,
तू तैस ढालरो ज़ेरो अपने कृपाई सेइं घेरतां रखतस।