1 हे यहोवा इश्शे प्रभु, तेरू नवं सारे ज़मीनी पुड़ बड़ू महाने!

तीं अपनि महिमा सुर्गे मां हिरेवरीए।

2 तीं अपने दुशमनां केरे वजाई सेइं बच्‍चे ते दुद्ध पीते बच्‍चां केरे ज़िरिये अपनि तारीफ़ करावरीए,

ताके तू दुश्मन्न ते बदलो नेनेबालन रोकी सकस।✝

3 ज़ैखन अवं अम्बरे, ज़ैन तीं अपने हथ्थन सेइं बनेवरूए,

ते चाँदनी ते तारे हेरताईं ज़ैना तीं ठहराए;

4 त फिरी मैन्हु कुने कि तू तैस याद रख्खस,

ते मैन्हु कुने कि तू तैसेरी खबर नेस?✝

5 किजोकि तीं तै परमेशरे करां थोड़ो ज़ेरो घट बनेवरोए,

ते महिमा ते इज़्ज़तरू मुकुट तैसेरे दोग्गे पुड़ रखोरूए।

6 तीं इन्सानेरे हथ्थां केरे कम्मन पुड़ अधिकार दित्तोरोए;

तीं सब किछ तैसेरे पव्वन हैठ कियोरूए।✝

7 सब भैड्डां-छ़ेल्‍ली ते बेछ़ी-दांत

ते ज़ेत्रे जंगलेरे जानबर आन,

8 अम्बरेरां च़ुड़ोलू ते समुन्दरेरी मेछ़ली,

ते ज़ेत्रे जीप-जन्तू समुन्दरन मां च़लते फिरतन।

9 हे यहोवा, हे इश्शे प्रभु,

तेरू नवं सारे धेतरी पुड़ बड़ू महाने।