1 हे इस्राएलेरे पुहाला,

असन पुड़ ध्यान दे, तू ज़ै यूसुफेरी अगवाई गब्बां केरि ज़ेरि केरतस!

तू ज़ै करूबन पुड़ बिशोरोस, अपनि महिमा हिरा!

2 एप्रैम, ते बिन्यामीन, ते मनश्शेरी ज़ेरि अपनि महिमा हिरेइतां,

असन बच़ानेरे लेई एई!

3 हे परमेशर, असन बहाल केर;

अपने तुत्तरेरी लौ चमका त असां बच़मेले।

4 हे सेनां केरे परमेशर यहोवा,

तू केइस तगर अपने लोकां केरि प्राथना सेइं क्रोधे रालो?

5 तीं तैन ऐंखरू केरि रोट्टी खुवेवरीए,

ते ऐंखरू केरे घड़े भेरि-भेरि पियावरेन।

6 तू असन इश्शे पड़ोसी केरे लड़नेरी वजा बनातस;

इश्शे दुश्मन एप्पु मांमेइं इश्शो मज़ाक बनातन।

7 हे सेनां केरे परमेशर, असन बहाल केर;

अपने तुत्तरेरी लौ असन पुड़ चमका,

त असां बच़ाए गामेले।

8 तीं मिस्र मुल्खे मरां दाछ़रू* अक बड़ आनू;

ते गैर कौमां केढतां तैन लावं।

9 तीं तैसेरे लेई ठार तियार कियोरीए;

ते तैनी ज़ील छ़डू ते फैलतां पूरो मुल्ख भेरि छ़डो।

10 तैसेरी छाव पहाड़न पुड़ फैली जेई,

ते तैसेरी डैलड़ी बड्डे-बड्डे गैइड़ां केरि ज़ेरि भोइ;

11 तैसेरे डाल समुन्दरे तगर फैली जे,

ते तैसेरे मुन्केरे फरात दरियाए तगर पुज़्ज़ी जे।

12 तीं तैसेरी चार दिवारी किजो बिछ़ोड़ी छ़डी?

कि सब बत्तां च़लनेबाले तैसेरी दाछ़ ट्लोड़तन?

13 जंगलेरे सूर तैस बरबाद केरतन,

ते मैइदानेरे सब जानबर तैस खातन।

14 हे सेनां केरे परमेशर, इश्शे पासे फिरी दुबारो मुड़,

सुर्गेरां ध्यान देइतां हेर, ते इस दाछ़री हिफाज़त केर,

15 ई बूटो तीं अपने देइने हथ्थे सेइं लव,

ते ज़ैस बड़हेरो डाल तीं अपने लेई मज़बूत कियो।

16 तै दाछ़ फुकोई जेई, तै केट्टोई जेई;

तेरे झ़िड़की सेइं तेरे दुश्मन नाश भोइ गान।

17 तेरे देइने हथ्थे सेइं सुमैलतां मैन्हु पुड़ तेरो हथ राए,

तैस मैन्हु पुड़, ज़ै तीं अपने लेई मज़बूत कियोरोए।

18 तैखन असां तीं करां दूर न भोमेले:

तू असन ज़ींतां, ते अस तीं कां प्राथना केरेले।

19 हे सेनां केरे परमेशर यहोवा, असन बहाल केर,

ते अपने तुत्तरेरी लौ असन पुड़ चमका,

तैखन असां बच़मेले!