1 हे इश्शे मुक्ति देनेबाले परमेशर यहोवा,

सैरी दिहैड़ी ते राती अवं अपने उदैसारे लेई तीं कां बिनती केरताईं।

2 मेरी प्राथना तीं तगर पुज़्ज़े,

अपनो कन मेरी बिनतरे पासे ला।

3 किजोकि मेरो प्राण दुखे सेइं भेरतांए;

ते मेरो प्राण पाताले तगर पुज़ोरोए।

4 अवं कब्री मां गानेबालन मां गनो जेवरोईं;

अवं कमज़ोर मैन्हेरो ज़ेरो भोवरोईं।

5 अवं मुड़दन मां छ़डोरोईं,

ते ज़ैना कत्ल भोइतां कब्री मां जेवरेन,

ते ज़ैन तू फिरी याद न केरस

ते तैना तेरी मद्दती करां दूरन,

तैन केरो ज़ेरो अवं भोइ जेवरोईं।

6 तीं अवं गड्ढेरे थले मां

आंधरे ते डुग्घे ठैरी रखोरोइं।

7 तेरो क्रोध मीं पुड़ बनोरोए;

ते तीं अपने सब लहरन सेइं मीं दुख दित्तोरोए। (सेला)

8 तीं मेरे सारे पिशाने बाले दोस्त मीं करां दूर कियोरेन;

ते अवं तैन केरि नज़री मां घटिया कियोरोईं।

अवं कैदी आईं ते छुट्टी न सेकी;

9 दुख भोगते-भोगते मेरी एछ़्छ़ी कैनी भोइ,

हे यहोवा, अवं रोज़ तीं पुकारतो रहताईं ते अपने हथ प्राथनारे लेई खड़े केरतो एवरोईं।

10 कुन तू मुड़दां केरे लेई बड्डां-बड्डां कम्मां हिरालो?

कुन मरोरे लोक तेरू शुक्र केरेले? (सेला)

11 कुन लोक कब्री मां तेरे प्यारेरो,

ते विनाशेरे हालती मां तेरी सच़्च़ेरू बियान कियूं गालू?

12 कुन तेरां बड्डां-बड्डां कम्मां आंधरे मां,

या तेरो धर्म धोखेबैज़रे हालती मां ज़ानो गालो?

13 पन हे यहोवा, अवं मद्दतरे लेई तीं पुकारताईं;

मेरी प्राथना रोज़ झ़ेझ़ां तेरे सामने पुज़्ज़ी गाचे।

14 हे यहोवा, तू मीं किजो शारतस?

ते अपनु तुत्तर मीं करां किजो छ़ुपेइतां रखतस?

15 अवं बचपनेरो दुखी मतलब अधमरो आईं,

तीं करां डेरतां अवं बड़ो परेशान आईं।

16 तेरो क्रोध मीं पुड़ भड़कोरोए;

तैस डरे करां अवं मिटी जेव।

17 तैना डरानेबैली चीज़ां सैरी दिहैड़ी पैनेरे ज़ेरि मीं घेरतां रेखतिन;

तै मेरे च़ेवरे पासे लेइहोते।

18 तीं अवं मेरे दोस्तन करां ते पुड़ोसन करां दूर केरतां रखोरोइं,

ते मेरे ज़ान-पिशानी बाले आंधरे मां छ़डोरेन।