1 केत्रू रोड़ूए यहोवारू शुक्र केरनू,

हे परमप्रधान परमेशर, तेरे नंव्वेरू भजन ज़ोनू;

2 झ़ेझ़ां तेरो प्यार,

ते राती तेरी सच़्च़ैइअरो प्रचार केरनो,

3 दश तारीबाले बाज़े ते सैन्गी पुड़,

ते सितारी पुड़ रोड़ो सूर लानो रोड़ोए।

4 किजोकि, हे यहोवा, तीं अवं अपने कम्मन सेइं खुश कियोरोईं;

ते अवं तेरे हथ्थां केरे कम्मां केरे वजाई सेइं जयजयकार केरेलो।

5 हे यहोवा, तेरां कम्मां केत्रां बड्डां आन!

ते तेरे खियाल केत्रे डुग्घे आन।✝

6 जानबरेरो ज़ेरो मैन्हु इस न समझ़े,

ते बेवकूफ इसेरो खियाल न केरे:

7 कि दुष्ट ज़ैना घासेरे ज़ेरे हरे-भरे रहतन,

ते सब अनर्थ केरनेबाले ज़ैना फुलतन-फलतन,

एन एल्हेरेलेइ भोते, कि तैना सदारे लेई नाश भोइ गान।

8 पन हे यहोवा, तू हमेशा महान आस।

9 किजोकि हे यहोवा, तेरे दुश्मन, हाँ तेरे दुश्मन नाश भोल्हे;

सब अनर्थ केरनेबाले तितर बितर भोल्हे।

10 पन तीं मेरू शिंग जंगली दांतेरू ज़ेरू उच्‍चु कियोरूए;*

तीं ताज़े तेले सेइं मेरू अभिषेक कियोरूए।

11 अपने-अपने दुश्मन्न पुड़ नज़र केरतां

ते तैन कुकर्म केरनेबालां केरो हाल ज़ैना मेरे खलाफ उठते थी।

12 धर्मी लोक खजूरेरे बुट्टेरे ज़ेरे खूब फलेले-फुलेले,

तैना लबानोनेरे गैइड़ेरे ज़ेरे बेडोते राले।

13 तैना यहोवारे भवने मां लेइतां,

इश्शे परमेशरेरे अंगन्न मां फुलेले फलेले।

14 तैना पुराने भोने पुड़ भी फलेले,

ते ताज़े ते हरे भरे भोल्हे,

15 ज़ैस सेइं इन बांदू भोए कि यहोवा सच़्च़ोए;

तै मेरी चट्टाने, ते तैस मां बुराई किछ भी नईं।