1 यहोवारे लेई अक नंव्वू गीत ज़ोथ,

हे सारे दुनियारे लोकव यहोवारे लेई गीत ज़ोथ।✝

2 यहोवारे लेई गीत ज़ोथ, तैसेरे नव्वें जो धन ज़ोथ;

रोज़ तैसेरे दित्तोरे मुक्तरी रोड़ी खबर शुनाते राथ।

3 गैर कौमन मां यहोवारे महिमारू,

ते मुल्खां-मुल्खां केरे लोकन मां तैसेरे चमत्कारां केरू बियान केरा।

4 किजोकि यहोवा महान ते बड़े तारीफ़रे काबले;

तै त सैरी देबतन करां जादे डरेरे काबले।

5 किजोकि मुल्खां-मुल्खां केरे सब देबते त सिर्फ मूरती आन,

पन यहोवाए सुर्ग बनावरूए।

6 तैसेरे च़ेवरे पासन शान-ओ-शोकते ते महिमा आहे;

ते तैसेरी पवित्र ठैरी सामर्थ ते शोभाए।

7 हे मुल्खां-मुल्खां केरे कुलां केरे लोकव, यहोवारी तारीफ़ केरा,

यहोवारी महिमा ते सामर्थ मन्ना!

8 यहोवारे नंव्वेरी एरी महिमा केरा ज़ै तैसेरे काबले;

च़ढ़तल नेइतां तैसेरे अंगन्न मां गाथ।

9 पवित्रतैई सेइं सेज़तां यहोवा कां मथ्थो टेका;

हे सारे दुनियारे लोकव, तैसेरे सामने थरकते राथ।

10 कौमन मां एलान केरा, "यहोवा राज़ोए!

ते दुनिया एरी कायमे, कि तै हिलनेरी नईं;

तै मुल्खां-मुल्खां केरे लोकां केरो न्याय सच़्च़ैई सेइं केरेलो।"

11 अम्बर खुशी भोए, ते ज़मीन मघन भोए,

समुन्दर ते तैस मां ज़ैना भी चीज़ां आन गरज़न।

12 मैइदान ते ज़ैन किछ तैस मांए, खुश भोए;

ते फिरी जंगलेरे बुट जयजयकार केरेले।

13 इन यहोवारे सामने भोए, किजोकि तै एजनेबालोए।

तै धेरतरो न्याय केरनेबालोए, तै धार्मिकता सेइं दुनियारो

ते सच़्च़ाई सेइं मुल्खां-मुल्खां केरे लोकां केरो न्याय केरेलो।