22 अवं अपने ढ्लां केरे सामने तेरे नंव्वेरो प्रचार केरेलो;

हछे लोकां केरे सामने तेरे नंव्वेरी तारीफ़ केरेलो।✝

23 तुस ज़ैना यहोवा करां डरने बालेथ, तैसेरी तारीफ़ केरा!

हे याकूबेरे खानदानेरे लोकव, तुस सब तैसेरी तारीफ़ केरा!

हे इस्राएलेरे खानदानेरे लोकव, तुस सब तैसेरो डर मन्ना!✝

24 किजोकि तैनी दुखी लोक घटिया नईं समझ़ोरे

ते न तैन सेइं बैर रख्खे,

यहोवा अपनु तुत्तर तैन करां नईं छ़ुपेवरू;

पन ज़ैखन तैनी तैस कां बिनती की, तैखन तैसेरी शुनी छ़डी।