1 हे परमेशर, तीं अस हमेशारे लेई किजो शारे?

एपनी चरागारी भैड्डन पुड़ तेरी सरक किजो भड़कती रहचे?

2 अपनि मण्डली ज़ै तीं पुराने ज़माने मां घिन्नोरी थी,

ते अपनु विरासतरू गोट्ल भोनेरे लेई छुटेवरू थियूं,

ते इस सिय्योन पहाड़े भी, ज़ैस पुड़ तीं बास कियोरू थियूं, याद केर!✝

3 अपने पव एना पुराने खंडरां केरे पासे च़ला,

मतलब तैन सब बुरैई केरे पासे ज़ैना दुश्मने पवित्र ठैरी मां कियोरिन।

4 तेरे मुखालफ तेरी पवित्र ठारी पुड़ मझ़ाटे गरज़तन;

तैनेईं अपने झण्डां केरो निशान बनेवरोए।

5 तैना तैन मैन्हु केरे ज़ेरे थिये

ज़ैना घने जंगलेरे बुट्टन पुड़ मैक्‍कु च़लातन;

6 ते हुनी तैना तैस भवनेरी नक्‍काशी,

मैक्‍कन ते हथोड़न सेइं बिलकुल ट्लोड़तां छ़डोरीए।

7 तैनेईं तेरी पवित्र ठार बिलकुल भस्म की,

ते तेरे नंव्वेरू भवन भी बिछ़ोड़तां अशुद्ध कियोरूए।

8 तैनेईं अपने मने मां ज़ोवरूए, "एज्जा असां एन मित्ती मां मिलाम।"

तैनेईं मुल्खे मां परमेशरेरी हर आराधना केरनेरी ठार फुक्‍की छ़डोरीए।

9 असन हुनी परमेशरेरो कोई बड़ो निशान न लेइहोए;

हुनी कोई नबी न राव,

न इश्शे दरमियान कोई इन ज़ाने कि एरी हालत केइस तगर भोल्ही।

10 हे परमेशर मुखालफ केइस तगर बदनामी केरते राले?

कुन दुश्मन, तेरे नंव्वेरी निन्दा सदा केरतो रालो?

11 तू अपनो देइनो हथ किजो रोकतां रखतस?

ते अपनो हथ अग्रोवं केरतां तैन केरो अन्त केर।

12 परमेशर त पुराने ज़मानेरो देंतो मेरो राज़ोए,

तैए दुनियाई मां मुक्ति देनेरां कम्मां केरतो एवरो।

13 तीं एपनी शेक्ति सेइं समुन्दरेरे दूई हिस्से किये;

तीं समुन्दरे मां मगरमच्छां केरे दोग भेन्नी दित्ते।

14 तीं त लिव्यातानेरे* दोग भेन्तां ते तैन केरे टुक्ड़े-टुक्ड़े केरतां जंगली जानबरन खुवाए।

15 तीं त पैनेरे नाग केढतां गड्डां बगेई,

तीं त बारहे महीने बगनेबाले दरिया शुकाए।✝

16 दिहाड़ी भी तेरीए, ते रात भी तेरीए;

दिहाड़ो ते चाँदनी तीं कायम कियोरीए।

17 तींए ज़मीनरी सब हद्दां ठहरेई;

ते तींए गेर्मेरो ते ठंढारो मौसम बनेवरोए।

18 हे यहोवा, याद केर कि दुश्मने बदनामी कियोरीए,

ते बेवकूफ लोकेईं तेरे नंव्वेरी निन्दा कियोरीए।

19 अपने कबूतरेरी जान जंगली जानबरेरे हवाले न केर;

अपने गरीब लोकन हमेशारे लेई न बिस्सर।

20 अपने करारेरी खबर ने ज़ै तीं असन सेइं कियोरोए;

किजोकि मुल्खेरे आंधरेरे ठैरी ज़ुलमेरां घरां भेरतन।

21 मुसीबतरे मारे शरमिन्दा भोइतां पत्रोवं हटनू न पे,

गरीब ते ज़रूरतमन्द लोक तेरे नंव्वेरी तारीफ़ केरि सकन।✝

22 हे परमेशर, उठ, अपनो मुकदमो एप्पु लड़;

तेरी ज़ै बदनामी बेवकूफेरे ज़िरिये सारे दिहैड़ी भोती रहतीए, तैस याद केर।

23 अपने दुश्मना केरि आवाज़ न बिस्सर,

तेरे मुखालफां केरो हंगामो लगातार भोतो रहते।