1 ज़ै परमप्रधान परमेशरेरी शरणी मां बिशोरो राए,

तैस सर्वशक्तिमानेरी छावी मां ठिकानो मैल्हेलो।

2 अवं यहोवारे बारे मां ज़ोइलो, "तै मेरी छ़पनेरी ठारे ते मज़बूत गढ़े;

तै मेरो परमेशरे, ज़ैस पुड़ अवं भरोसो रखताईं।"

3 किजोकि तै मीं शिकार केरनेबालेरे जाले करां,

ते महामैरी करां बच़ालो;

4 तै तीं अपने फंघन हैठ रखेलो,

ते तीं तैसेरे फंघन हैठ शरण मैल्हेली;

तैसेरी सच़्च़ाई तेरे लेई ढाल ते झिलम भोल्ही।

5 न तू रातरे कोन्ची डरे करां डरेलो,

न तैस तीरे करां ज़ै दीसां च़लते,

6 न तैस मरी करां ज़ै आंधरे मां च़लतीए,

ते न तैस महारोगे करां ज़ै भर दुपहरेईं उज़ाड़ते।

7 तेरे नेड़े हज़ार,

ते तेरे देइने पासे दश हज़ार बिछ़ड़तां मेरि गाले;

पन तै तीं कां न एज्जेलो।

8 तू एपनी एछ़्छ़न सेइं नज़र केरेलो,

ते दुष्टां केरो अन्त हेरेलो।

9 हे यहोवा, तू मेरी छ़पनेरी ठारस।

तीं ज़ै परमप्रधान अपने रानेरी ठार बनेवरीए,

10 एल्हेरेलेइ कोई आफत तीं पुड़ न पेली,

न कोई दुख तेरे डेरेरे नेड़े एज्जेलो।

11 किजोकि तै अपने दूतन तेरे लेई हुक्म देलो,

कि ज़ैड़ी भी तू गास तैना तेरी हिफाज़त केरन।

12 ते तैना स्वर्गदूत तीं अपने हथ्थन पुड़ छ़ूले,

एरू न भोए कि तेरे पव्वन घोड़न सेइं ठोकर लग्गे।

13 तू शेर ते सप्पे ढ्लेन्च़ेलो,

तू जुवान शेरे ते अजगरे ढ्लेन्च़ेलो।

14 तैने ज़ै मीं सेइं प्यार कियो, एल्हेरेलेइ अवं तैस छुटेइलो;

अवं तैस उच्‍चे ठैरी पुड़ रखेलो, किजोकि तैने मेरू नवं ज़ानेरूए।

15 परमेशर ज़ोते, ज़ैखन तै मीं पुकारेलो, तैखन अवं तैसेरी शुनेलो;

मुसीबती मां अवं तैस सेइं साथी रालो,

अवं तैस छुटेइतां तैसेरी इज़्ज़त बधेइलो।

16 अवं तैस लम्मी उमर देइलो,

ते तैस मुक्ति हरेइलो।