Salmos 1

परमेशरेरे कानूने मां सच़्च़ू सुख

1 केत्रो धने तै मैन्हु ज़ै दुष्ट लोकां केरे सलाही पुड़ न च़ले,

ते न पापी लोकां केरि बत्तन मां खड़ो भोए;

ते मज़ाक बनाने बालां केरि सेंगती मां न बिश्शे!

2 पन तै त यहोवारे कानूने सेइं खुशी भोते;

ते तैसेरे कानूने पुड़ रात दिहैड़ी ध्यान केरतो रहते।✝1:2 यहो. 1:8.

3 तै मैन्हु तैस बुट्टेरो ज़ेरोए, ज़ै बगते पैनेरे गड्डां केरे बन्ने पुड़ लेवरोए

ज़ैस अपने ठीक वक्ते पुड़ फल लगते,

ते ज़ैसेरां पट्लां कधी न शुक्‍कन।

ते ज़ैन किछ तै मैन्हु केरे तैन कामयाब भोते।✝1:3 यिर्म. 17:8;भज. 92:12-14.

4 दुष्ट लोक एरे न भोन,

पन तैना तैस झ़ाझ़रे ज़ेरे भोतन, ज़ै बात च़लते उडारी गातीए।

5 एल्हेरेलेइ दुष्ट लोक न्यायेरे वक्ते खड़े न रेइ बटेले,

ते न पापी लोक धर्मी लोकां केरे सेंगती मां रेइ सकेले;

6 किजोकि यहोवा धर्मी लोकां केरि बत ज़ानते,

पन दुष्ट लोकां केरि बत नाश भोइ गाली।✝1:6 भज. 68:2;73:27;92:9.