भजन संहिता 121

परमेशर इश्शी रक्षा केरते

सफरेरू गीत

1 अवं एपनी एछ़्छ़ी पहाड़ां केरे पासे केरेलो।

मीं मद्दत कोट्ठां मैल्हेली?

2 मीं मद्दत यहोवारे तरफां मैलतीए,

ज़ै अम्बरे ते धरती बनानेबालोए।

3 यहोवा तेरे पव्वन टलने न देलो,

तेरो रक्षा केरनेबालो न झ़ुलेलो।

4 शुन, इस्राएलेरो रक्षा केरनेबालो,

न ऊंगेलो ते न झ़ुलेलो।

5 यहोवा तेरो रक्षा केरनेबालोए,

यहोवा तेरे देइने पासे तेरी आड़े।

6 न दीसां धुप्पी सेइं,

ते न राती चाँदनी तीं नुकसान पुज़ेई बटे।

7 यहोवा हर आफती करां तेरी रक्षा केरेलो;

तै तेरी जानी बिलकुल बच़ेइतां रखेलो।

8 यहोवा तेरे एजने-गाने मां

तेरी हिफाज़त हुना करां सदा तगर केरतो राए।