1 अम्बर परमेशरेरी महिमारे बारे मां बियान केरते;

ते आकाशमण्डल तैसेरे हथ्थां केरि कारीगिरी हिराते।

2 दिहैड़ी सेइं दिहाड़ी गल्‍लां केरचे,

ते रात राती ज्ञान शिखालतीए।

3 न कोई बोलीए, ते न कोई भाषा;

ज़ैड़ी तैन केरो शब्द न भोए शुनोतो।

4 फिरी भी तैन केरि आवाज़ सैरी धेरती पुड़ शुनोरीए,

ते तैन केरो शब्द दुनियारे आखरी कूने तगर पुज़ोरोए।

तैनी दिहाड़ेरे लेई तैन मां अक तेम्बु लेवरोए।*

5 ज़ै लाड़ेरो ज़ेरो अपने मेहले मरां निस्ते।

ते पहलवानेरो* ज़ेरो अपनि दौड़ दौड़नेरे लेई खुशी भोते।

6 तै अम्बरेरे एक्‍की पासेरां निसते,

ते तैसेरे होरि पासे तगर चक्‍कर मारते;

ते तैसेरी गेर्मी सेइं किछ भी बेच़ी न सके।

7 यहोवारो कानून सही आहे, तै जानी बहाल केरते;

यहोवारे नियम भरोसेरे काबलन;

ते सिद्धे सादे लोकन अक्लमन्द बनातन;

8 यहोवारे उपदेश सिद्धन, तैन सेइं दिल खुश भोते;

यहोवारो हुक्म सही आहे;

तैस सेइं एछ़्छ़न लौ मैलचे।

9 यहोवारो डर बिलकुल पवित्रे, तै हमेशा तगर बनोरो रहते;

यहोवारे नियम बिलकुल सच़्च़े ते पूरे तरीके सेइं सही आन।

10 तैना नियम सोन्नेरे ते खालिस सोन्ने करां जादे मने पसंद एजने बाले आन;

तैना मैछ़ी करां ते कश्शे मरां ट्लिशड़ने बाले मैछ़ी करां जादे रोड़ेन।✝

11 तैन्ने सेइं अवं तेरो दास खबरदार कियो गाताईं;

तैन्न मन्ने सेइं बड़ो फल मैलते।✝

12 कौन अपनि गेलती सेमझ़ी सकते?

मेरे छ़पोरे पापन करां मीं पवित्र केर।

13 तू अपने दासे ढीठ भोनेरे पापन करां भी बच़ेइतां रख;

तैन केरो मीं पुड़ कोई दबाव न लोड़े!

तैखन अवं सिद्ध भोल्हो, ते बड़े पापन करां बच़ोरो रेइलो।✝

14 हे यहोवा परमेशर, मेरी चट्टान ते मेरी मुक्ति केरनेबाले,

मेरे ऐशेरी गल्‍लन ते मेरे दिलेरू ध्यान तेरे सामने कबूल भोए।