1 केत्रो धने तै, ज़ै गरीब मैन्हेरो खियाल रखते!

मुसीबतरे मौके यहोवा तैस बच़ालो।

2 यहोवा तैसेरी हिफाज़त केरतां तैस ज़ींतो रखेलो,

ते तै धेरती पुड़ धन भोल्हो।

तू तैस दुश्मना केरि इच्छाई पुड़ न छ़ड।

3 बिमार भोनेरे मौके यहोवा

तैस बिछ़ाने पुड़ भी सुमैलतां रखेलो;

तू तैसेरी सहेत रोड़ेच़ारे ठीक केरेलो।

4 मीं प्राथना की, "हे यहोवा, मीं पुड़ दया केर;

मीं बझ़ा,

किजोकि मीं तेरे खलाफ बड़ो भारी पाप कियोरोए!"

5 मेरे दुश्मन मेरे बारे मां इन ज़ोइतां मेरी बुराई केरतन

"तै किताली मरे, ते तैसेरू नवं किताली मिटेलू?"

6 ते ज़ैखन तै मीं सेइं मिलने एइते,

तैखन बेकार गल्‍लां केरते,

ज़ैखन तैसेरो मन अपने अन्तर अधर्मेरी गल्‍लां अकोट्ठी केरते;

ते बेइर गेइतां तैन केरि चर्चा केरते।

7 मीं सेइं नफरत केरनेबाले सब एप्पु मांमेइं मेरे खलाफ मिश्कतन;

तैना मेरे खलाफ भोइतां मेरे नुक्सानेरी योजना केरतन।

8 तैना ज़ोतन कि इस त कोई बुरो रोग लगोरोए;

तै कधी भी अपने बिछ़ाने पुड़ेरां दुबारां खड़ो न भोल्हो।

9 मेरो खास दोस्त ज़ैस पुड़ अवं भरोसो केरतो थियो,

ते ज़ै मेरी रोट्टी खातो थियो,

तै भी मेरे खलाफ भोव।✝

10 पन हे यहोवा, तू मीं पुड़ दया केरतां,

मीं दुबारो खड़ो केर कि अवं तैन बदलो देइ सेकी।

11 मेरो दुश्मन ज़ै मीं पुड़ ज़ींती न सके,

तैस इस गल्‍ली सेइं पतो लगोरोए कि तू मीं सेइं खुश आस।

12 ते मीं त तू सच़्च़ैई सेइं सम्भालस,

ते हमेशारे लेई अपने सामने कायम केरतस।

13 इस्राएलेरो परमेशर यहोवा

शुरू करां आखरी तगर तैसेरी तारीफ़ भोए।

आमीन, फिरी आमीन।✝