1 हे मेरे परमेशर, मीं दुश्मन्न करां बच़ा,

मीं उच्‍चे ठैरी पुड़ रेखतां मेरे दुश्मन्न करां बच़ा।

2 मीं बुराई केरनेबाले लोकन करां छुटा,

ते खून केरनेबालन करां मीं आज़ाद केर।

3 किजोकि हेर, तैना मीं मारनेरे लेई ताकी मां बिशोरेन;

हे यहोवा मेरो कोई दोष या पाप नईं,

फिरी भी ताकतबर लोक मेरे खलाफ अकोट्ठे भोतन।

4 अवं बेकसूर आईं फिरी भी तैना मीं सेइं लड़नेरे लेई मेरे पासे दौड़तन;

बींझ़ ते मेरी मद्दत केर, ते इन हेर!

5 हे सेनां केरे परमेशर यहोवा,

हे इस्राएलेरे परमेशर सब गैर कौमन सज़ाह देनेरे लेई बींझ़;

कोन्ची धोखेबाज़ ज़ुलम केरनेबाले पुड़ अनुग्रह न केर। (सेला)

6 ड्लवझ़ी मेरे दुश्मन वापस एइतां कुतरेरे ज़ेरे घुक्तन,

ते नगरेरे च़ेवरे पासन घुमतन।

7 हेर तैना डेकार मारतन, ते तैन केरे ऐशी मां तलवारन,

किजोकि तैना तैन सेइं ज़ोतन, "कौन शुन्ते?"

8 पन तू हे यहोवा, तैन पुड़ हस्सेलो;

तू गैर कौमां केरो मज़ाक बनालो।

9 हे परमेशर, मेरी ताकत, अवं तीं पुड़ ध्यान देइलो,

तू मेरो उच्‍चो क़िलोस।

10 परमेशर दया केरतो मीं सेइं मिलेलो;

परमेशर मेरे दुश्मना केरे बारे मां मेरी इच्छा पूरी केरेलो।

11 तैन नाश न केर, एरू न भोए कि मेरी कौम तीं बिसरी गाए;

हे प्रभु, इश्शी ढाल!

एपनी शेक्ति सेइं तैन तितर बितर केर, ते तैन दबेइ दे।

12 तै अपने ऐशेरे पाप, ते ओठां केरि गल्‍लन,

ते लानत देने, ते अपने झूठ ज़ोनेरे वजाई सेइं,

घमण्डे मां फसोरे ट्लाए गान।

13 सरकी सेइं तैन तबाह केर,

तैन केरो अन्त केर ताके तैना नाश भोइ गान

तैखन लोक ज़ानेले कि परमेशर याकूबे पुड़

बल्के पूरे दुनियाई मां राज़ केरते। (सेला)

14 रोज़ ड्लवझ़ी तैना वापस एइतां कुतरां केरे ज़ेरे घुक्तन,

ते नगरेरे च़ेवरे पासन हंठतन ते फिरतन।

15 तैना रोट्टरे टुक्ड़ेरे लेई मारे-मारे फिरतन,

ते न रज़्ज़नेरे वजाई सेइं सारी रात कुतरां केरे ज़ेरे घुक्तन।

16 पन अवं तेरी शेक्तरी तारीफ़ केरेलो;

ते झ़ेझ़ां तेरी दयारे लेई जयजयकार केरेलो।

किजोकि तू मेरो उच्‍चो क़िलोस,

ते मुसीबतरे वक्ते मेरी छ़पनेरी ठारस।

17 हे मेरी ताकत, अवं तेरू भजन ज़ोइलो,

किजोकि हे परमेशर, तू मेरो उच्‍चो क़िलोस

ते मेरो महरबान परमेशरस।