1 हे यहोवा, अवं तेरी शरणी मां रहताईं;

मीं शरमिन्दा न भोने दे।

2 तू त धर्मी आस, मीं छुटा ते मीं मुक्ति दे;

अपनो कन मेरे पासे ला, ते मीं मुक्ति दे।

3 मेरे लेई सनातन कालेरी चट्टानरू धाम बन, ज़ैस मां अवं सदा गेइ सेकी;

तीं मेरे मुक्तरो हुक्म त दित्तोरोए,

किजोकि तू मेरी चट्टान ते मेरो क़िलो ठहरोरोस।

4 हे मेरे परमेशर, दुष्टेरे

ते बुरे ते सखत मैन्हेरे हथ्थे करां मेरी हिफाज़त केर।

5 किजोकि हे प्रभु यहोवा, अवं तीं बलगतो एवरोईं;

बचपनेरो मेरो आधार आस।

6 ज़र्मते अवं तीं सम्भालो;

तींए अवं अम्मरे पेटे मरां कढो;

एल्हेरेलेइ अवं हमेशा तेरी बडीयाई केरतो रेइलो।

7 बड़े लोकां केरे लेई अवं हैरान रानेरी वजा आईं;

पन तू मेरी छ़पनेरी ठारस।

8 मेरे ऐशी सेइं तेरी तारीफ़

ते सारे दिहैड़ी तेरी शोभारू बियान बड़ू जादे भोए।

9 बुढापे मां तू मीं न शार;

ज़ैखन मेरी ताकत घटे तैखन मीं न शार।

10 किजोकि मेरे दुश्मन मेरे बारे मां गल्‍लां केरतन,

ज़ैना मेरे जानरे ताकी मां आन

तैना एप्पु मांमेइं ई सलाह केरतन कि

11 तैना एक्‍की होरि सेइं ज़ोतन, परमेशरे तै शारोरोए;

तैसेरो पीछो केरतां तैस ट्ला, किजोकि तैसेरो कोई छुटानेबालो नईं।

12 हे परमेशर, मीं करां दूर न रा;

हे मेरे परमेशर, मेरी मद्दत केरने मां लूश केर।

13 ज़ैना मेरे जानरे दुश्मन आन, तैना शरमिन्दा भोन,

ते तैन केरो अन्त भोए;

ज़ैना मेरे नुक्सानेरी इच्छा केरतन, तैना बदनामी

ते बेइज़्ज़ती मां पेन।

14 पन अवं हमेशा उमीद लेइतां रेखेलो,

ते जादे करां जादे तेरी तारीफ़ केरतो रेइलो।

15 अवं अपने ऐशी सेइं तेरी धार्मिकतारू,

ते तेरे कियोरी मुक्तरू बियान सारे दिहैड़ी केरतो रेइलो,

किजोकि तैन केरो पूरो ब्योरो मेरी समझ़ी करां दूरे।

16 अवं प्रभु यहोवारे बड्डां कम्मां केरू बियान केरतां एज्जेलो,

अवं सिर्फ तेरे धार्मिकतारी चर्चा केरेलो।

17 हे परमेशर, तू मीं बचपनेरो देंतो शिखालतो एवरोस,

ते अज़ तगर अवं तेरे आजीब कम्मां केरू एलान केरताईं।

18 एल्हेरेलेइ हे परमेशर ज़ैखन अवं बुढो भोईं,

ते मेरे दोग्गेरे बाल छ़ित्ते भोन, तैखन भी तू मीं न शार,

ज़ांतगर अवं एजने बाले पीढ़रे लोकन

तेरी बड़ी ताकत ते सब पैदा भोने बालन तेरी कुदरत न शुनेईं।

19 हे परमेशर, तेरी धार्मिकता बड़ी महाने,

तीं ज़ैनी महान कम्मां कियां,

हे परमेशर तीं बराबर कौने?

20 तीं त असन बड़े सखत दुख हिरावरेन,

पन मीं तू फिरी दुबारे ज़ींते केरेलो,

तू मीं ज़मीनरे थलेरां वापस आनेलो।

21 तू मेरी इज़्ज़त बधालो,

मीं मुड़तां मीं तसल्‍ली देलो।

22 हे मेरे परमेशर,

अवं भी तेरे सच़्च़ेरू शुक्र सारंगी बज़ेइतां गीतां ज़ोइलो;

हे इस्राएलेरे पवित्र परमेशर अवं वीणा बज़ेइतां तेरू भजन ज़ोइलो।

23 ज़ैखन अवं तेरू भजन ज़ोइलो, तैखन अपने ऐशी सेइं

ते अपने प्राणे सेइं भी ज़ै तीं बच़ावरोए जयजयकार केरेलो।

24 ते अवं तेरे धार्मिकतारी चर्चा सारे दिहैड़ी केरतो रेइलो;

किजोकि ज़ैना मेरे नुक्सानेरी इच्छा केरते थिये।

तैना शरमिन्दा ते बेइज़्ज़त भोए।