1 हे प्रभु, तू पीढ़ी करां पीढ़ी तगर इश्शी रानेरी ठार राहोरोस।

2 एस करां पेइले कि पहाड़ां पैदा भोआं,

ते तीं ज़मीन ते दुनिया बनाई,

बल्के शुरू करां हमेशा तगर तूए परमेशरस।

3 तू इन्साने फिरी मित्ती मां मिलातस,

ते ज़ोतस, "हे मैन्हव, वापस एज्जा!"

4 किजोकि तेरी नज़री मां हज़ार साल एरे आन,

ज़ेन्च़रे हीजेरी दिहाड़ी ज़ै बीती जेई,

या रातरो अक पहर।

5 तू इन्सानन हड़ैइअरो ज़ेरो रुड़ातस,

तैना सुपनेरे ज़ेरे भोतन,

तैना झ़ेझ़ेरे बेडोने बाले घासेरे ज़ेरे भोतन।

6 ज़ै झ़ेझ़ां लगते ते बेडोते,

पन ड्लवझ़ी तगर ट्लेकतां शुक्‍की गाते।

7 किजोकि असां तेरे क्रोधे सेइं नाश भोवरेम,

ते तेरी सरकी करां डेरि जेवरेम।

8 तीं इश्शां बुरां कम्मां अपने सामने रखां,

ते इश्शे छ़पोरे पाप अपने तुत्तरे अगर रखोरेन।

9 किजोकि इश्शे सारे ज़िन्दगरे दिहाड़े तेरे क्रोधे मां बीती गातन,

असां अपने साल शब्देरे ज़ेरे बीतातम।

10 इश्शी उमरारे साल 70 त भोतन,

ते ताकतरे वजाई सेइं 80 भी भोइ गान,

फिरी भी तैन केरू घमण्ड सिर्फ तकलीफ ते दुखे-दुखे;

ते तैना लूशी गुज़री गातन, ते असां च़ले गातम।

11 तेरे क्रोधेरी शक्ति?

ते तेरे डरेरे काबल तेरी सरकी कौन सेमझ़ी सकते?

12 असन अपने ज़िन्दगरे दिहाड़े गन्नेरी समझ़ दे, कि अस अक्लमन्द भोइ गाम।

13 हे यहोवा, वापस एई! केइस तगर?

ते अपने दासन पुड़ तरस खा!

14 झ़ेझ़ां असन एपनी दयाई सेइं भरपूर केर,

कि असां ज़िन्दगी भर जयजयकार ते आनन्द केरते रहम।

15 ज़ेत्रे दिहाड़े तू असन दुख देतो एवरोस,

ते ज़ेत्रे साल असां तकलीफ झ़ैलते एवरेम

तेत्रे साल असन आनन्द दे।

16 तेरू कम तेरे दासन,

ते तेरी महिमा तैन केरि औलादी पुड़ बांदी भोए।

17 इश्शे परमेशर यहोवारी कृपा असन पुड़ भोए,

तू इश्शे हथ्थां केरू कम इश्शे लेई मज़बूत केर,

इश्शे हथ्थां केरां कम्मां मज़बूत केर।