1 हे परमेशर मेरो दिल मज़बूते;

अवं गीत ज़ोइलो, अवं अपने दिले सेइं भी भजन ज़ोलो।

2 हे सैन्गी ते सितार बींझ़ां,

अवं एप्पु लौ भोते बींझ़ो।

3 हे यहोवा, अवं मुल्खे-मुल्खेरे लोकन मां तेरू शुक्र केरेलो।

ते रियासतां-रियासतां केरे लोकां केरे दरमियाने मां तेरू भजन ज़ोइलो।

4 किजोकि तेरी करुणा अम्बरे करां भी उच्‍चीए,

ते तेरी सच़्च़ाई अम्बरे तगरे।

5 हे परमेशर, तू सुर्गे करां बह भोस,

ते तेरी महिमा सैरी दुनियाई पुड़ भोए!

6 एल्हेरेलेइ तेरे ट्लारे छुटाए गान,

तू अपने देइने हथ्थे सेइं बच़ा ते इश्शी प्राथना केरो जुवाब दे!

7 परमेशरे एपनी पवित्रतैई मां एन ज़ोवरू

"अवं खुशी सेइं शेकेम नगरे बेन्टेलो,

ते सुक्‍कोतेरी वादी नापेइलो।

8 गिलाद मेरोए, मनश्शे भी मेरो आहे;

ते एप्रैम मेरे क्रोड़रो टोपे; यहूदा मेरी शाही सोटीए।

9 मोआबेरो मुल्ख मेरे धोनेरू भांडे,

ते एदोमे पुड़ अवं अपनो बूट शैरेलो, ते पलिश्ते पुड़ जयजयकार केरेलो।"

10 हे परमेशर, मीं क़िले बाले नगरे मां कौन पुज़ालो?

एदोमे तगर केने अवं नेव?

11 हे परमेशर, कुन तीं असां न शारे?

ते हे परमेशर, तू जंगी मां इश्शी सेनाई अग्री-अग्री न च़लो।

12 दुश्मनेरे खलाफ इश्शी मद्दत केर

किजोकि मैन्हेरी मद्दत बेकारे!

13 परमेशरेरी मद्दती सेइं असां बहदरी हिरामेले,

इश्शे दुश्मन्न तैए ढ्लन्च़ी देलो।