प्रधान बज़ानेबालेरे लेई दाऊदेरू भजन

1 हे यहोवा, तीं अवं पेरखतां ज़ानोरोईं।✝139:1 रोम. 8:27.

2 तीं मेरे उठनेरो ते बिशनेरो पतोए;

ते तू मेरे खियालन दूरेरां समझ़तस।

3 तू मीं ज़ानतस, चाहे अवं बत्ती मां भोईं चाहे आराम केरीं,

तू मेरी सैरी बत्तां केरो बाकमस।

4 हे यहोवा, मेरे ज़बानी पुड़ कोई गल नईं

ज़ैस तू पूरे तरीके सेइं ज़ानतो न भोस ज़ैन अवं ज़ोइलो।

5 तू मीं च़ेवरे पासना घेरतां रखतस,

ते तेरो हथ मीएं पुड़ रहते।

6 एन ज्ञान मेरे लेई बड़ू मुश्किले;

ते एन गम्भीर ते मेरी समझ़ी करां बेइरे।

7 अवं तेरी आत्मा करां कोरहां नेश्शी?

या तेरे सामनेरां कोरहां नेश्शी?

8 अगर अवं अम्बरे पुड़ च़ेढ़ी, त तू तैड़ी आस!

अगर अवं अपनि खट पाताले मां बछ़ेईं त तैड़ी भी तू आस!

9 अगर अवं झ़ेझ़री किरणन पुड़ च़ेढ़तां समुन्दरे पार बेस्सी,

10 त तैड़ी भी तू अपने हथ्थे मेरी अगवाई केरेलो,

तैड़ी भी तेरो देइनो हथ मीं ट्लेइतां रखेलो।

11 अगर अवं ज़ोईं कि आंधरे मां त अवं छ़ेप्पी गेईं,

ते मेरे च़ेवरे पासां केरि लौ रातरू आंधरू भोइ गाए,

12 फिरी भी आंधरू तीं करां न छ़पेलू, रात दीसरे बराबर लौ देली;

किजोकि तेरे लेई आंधरू ते लौ दूईये अक्‍कां ज़ेरां आन।

13 किजोकि तीं मेरे एंत्रीं अंग बनेवरेन*139:13 बनेवरेन हिफाज़त कियोरीए;

तीं अवं अम्मरे पेटे मां बनाव।

14 अवं तेरू शुक्र केरेलो, एल्हेरेलेइ कि अवं भयानक ते अद्भुत तरीके सेइं बनाव जेवरोईं,

तेरां कम्मां त हैरान केरनेबालन,

ते अवं एन रोड़ेच़ारे ज़ानताईं।

15 मेरो ढांचो तीं करां छ़पोरो न थियो,*139:15 मेरे अम्मरे पेटेरे आंधरे मां

ज़ैखन अवं खुफिया ठैरी बनेवरो थियो,

तैखन मेरी हेड्डी तीं करां छ़ेपोरी न थी।

16 तेरी एछ़्छ़ेईं अवं तैखने लाहोरो थियो,

ते मेरे सब अंग ज़ैना रोज़ बनते गाते थिये तैना बन्ने करां पेइले

तेरी किताबी मां लिखोरे थिये।

17 हे परमेशर, मेरे लेई त तेरे खियाल केत्रे बड़े कीमती आन!

तैन केरि तैधातरो जोड़ केत्रो बड्डोए।

18 अगर अवं तैन गेनि बटेथो त तैना रेती करां भी जादे निसने थिये,

ज़ैखन अवं बींझताईं, त तैखन भी तीं सेइं साथी रहताईं।

19 हे परमेशर सच़्च़े तू दुष्टे मैरी देलो!

हे खून केरनेबालव मीं करां दूर भोथ।

20 किजोकि तैना तेरे खलाफ भोतन ते धोखेरां कम्मां केरतन;

तेरे दुश्मन तेरू नवं झूठी गल्‍ली पुड़ घिन्तन,

21 हे यहोवा, कुन अवं तैन सेइं नफरत न केरीं ज़ैना तीं सेइं नफरत केरतन?

ते तेरे मुखालफन सेइं नफरत न केरि।

22 हाँ, अवं तैन सेइं पूरो बैर रखताईं;

अवं तैन अपने दुश्मन समझ़ताईं।

23 हे परमेशर, मीं पेरखतां ज़ान!

मीं पेरखतां मेरी फिकरां ज़ान!

24 ते हेर कि मीं मां कोई बुरी चाले कि नईं,

ते हमेशारी बत्ती मां मेरी अगवाई केर।