Salmos 19

सृष्टरे ज़िरिये सृष्टि बनाने बालेरी महिमारू बियान

1 अम्बर परमेशरेरी महिमारे बारे मां बियान केरते;

ते आकाशमण्डल तैसेरे हथ्थां केरि कारीगिरी हिराते।

2 दिहैड़ी सेइं दिहाड़ी गल्‍लां केरचे,

ते रात राती ज्ञान शिखालतीए।

3 न कोई बोलीए, ते न कोई भाषा;

ज़ैड़ी तैन केरो शब्द न भोए शुनोतो।

4 फिरी भी तैन केरि आवाज़ सैरी धेरती पुड़ शुनोरीए,

ते तैन केरो शब्द दुनियारे आखरी कूने तगर पुज़ोरोए।

तैनी दिहाड़ेरे लेई तैन मां अक तेम्बु लेवरोए।*19:4 आयत 4 पौलुसे रोमियो 10 आयत 18 मां भी इस्तेमाल कियोरोए कि मसीह सन्देश फैलाए।

5 ज़ै लाड़ेरो ज़ेरो अपने मेहले मरां निस्ते।

ते पहलवानेरो*19:5 पहलवानेरो खलाड़ी ज़ेरो अपनि दौड़ दौड़नेरे लेई खुशी भोते।

6 तै अम्बरेरे एक्‍की पासेरां निसते,

ते तैसेरे होरि पासे तगर चक्‍कर मारते;

ते तैसेरी गेर्मी सेइं किछ भी बेच़ी न सके।

7 यहोवारो कानून सही आहे, तै जानी बहाल केरते;

यहोवारे नियम भरोसेरे काबलन;

ते सिद्धे सादे लोकन अक्लमन्द बनातन;

8 यहोवारे उपदेश सिद्धन, तैन सेइं दिल खुश भोते;

यहोवारो हुक्म सही आहे;

तैस सेइं एछ़्छ़न लौ मैलचे।