1 अवं परमेशरे कां बिनती ज़ोरे-ज़ोरे सेइं केरेलो,

अवं परमेशरे कां फरियाद केरेलो, ते तै मेरे पासे ध्यान देलो।

2 एपनी मुसीबती मां मीं अपने प्रभु कां प्राथना की,

रातरे मौके मेरे हथ खड़े राए, ते ढिल्‍ले न भोए,

मीं तसल्‍ली न भोइ।

3 अवं परमेशरे याद केरतां कर लाताईं;

अवं फिक्र केरते-केरते बेचैन भोइ जेवरोईं; (सेला)

4 तू मेरी एछ़्छ़ी बन्द भोने न देस;

अवं एरहो घबराताईं कि अवं गल भी न केरीं सेखी।

5 अवं पुराने ज़माने पुड़ खियाल केरताईं,

ते तैन सालन पुड़ ज़ैन गुज़रोरे बड़ू च़िर भोवरूए।

6 अवं राती अपना गीतां याद केरताईं;

ते अपने मने मां ध्यान केरताईं,

कि मेरी आत्मा तलाश केरती रहचे।

7 "कुन प्रभु हमेशारे लेई शारेलो;

कुन तै असन अज़्ज़ेरे बाद कधी भी पसंद न केरेलो?

8 कुन तैसेरी करुणा हमेशारे लेई खतम भोवरीए?

कुन तैसेरे वाधे अज़्ज़ेरे बाद बेफल भोइ गाले?

9 कुन परमेशरे अनुग्रह केरनो बिसरो?

कुन तैनी क्रोध केरतां अपनि सब दया रोकतां रख्खोरीए?" (सेला)

10 अवं ज़ोने लगो, "ई मेरो दुखे, कि प्रभु परमप्रधानेरो देइनो हथ बेदलोई जेवरोए।"

11 अवं यहोवारे बड्डां कम्मां केरि चर्चा केरेलो;

ते अवं तेरे चमत्कार याद केरेलो ज़ैना तीं बीतोरे वक्ते मां किये।

12 अवं तेरे सब कम्मन पुड़ ध्यान केरेलो,

ते तेरे बड़े कम्मन सोचेलो।

13 हे परमेशर, तेरी बत पवित्रतारीए।

कौन ज़ेरो देबतो परमेशरेरे बराबर बड्डोए?

14 तूए चमत्कार केरनेबालो परमेशरस,

तींए कौमां केरे दरमियाने मां अपनि शक्ति बांदी कियोरीए।

15 बेड़ी ताकती सेइं तीं अपने लोक,

याकूब ते यूसुफेरू खानदान छुटेवरूए। (सेला)

16 हे परमेशर, समुन्दरे तू लाव,

समुन्दर तीं लेइतां डेरि जेव,

डुग्घो समुन्दर भी हिलने लगो।

17 बिदलारी सेइं बड़ी झ़ड़ी भोइ;

अम्बर गुड़ने लगू,

ते तेरे तीर इरां-उरां च़लने लगे।

18 आँधी तूफाने मां तेरी आवाज़ कड़कने लगी,

ते दुनिया बिजली सेइं रौशन भोइ;

ज़मीन हिलती-हिलती उछ़ड़ी जेई।

19 तेरी बत समुन्दरे मांए,

ते तेरी बत डुग्घे पैनी मांए;

ते तेरे पव्वां केरे निशाना केरो कोई पतो न लग्गे।

20 तीं मूसेरे ते हारूनेरे ज़िरिये,

अपने लोकां केरि अगवाई गब्बां केरे ज़ेरि की।