Salmos 51

पाप माफ़ केरनेरे लेई प्राथना

साज़ बज़ानेबालां केरे प्रधानेरे लेई दाऊदेरू भजन ज़ैखन नातान नबी तैस कां एल्हेरेलेइ अव कि तै बतशेबा कां जेवरो थियो

1 हे परमेशर, अपनि दयारे मुताबिक मीं पुड़ अनुग्रह केर;

अपने बड़े दयारे मुताबिक मेरे पाप माफ़ केर।✝51:1 लूक. 18:13;यशा. 43:25.

2 मीं रोड़ेच़ारे धोइतां मेरो कसूर साफ केर,

ते मेरो पाप छुटेइतां मीं शुद्ध केर!

3 किजोकि अवं अपने पापन ज़ानताईं,

ते मेरो पाप हमेशा मेरे सामने रहते।✝51:3 2 शमू. 12:13.

4 मीं सिर्फ तेरे खलाफ पाप कियोरोए,

मीं तैन कम कियोरूए ज़ैन तेरी नज़री मां बुरूए,

ताके तू ज़ोने मां धर्मी

ते न्याय केरने मां बेकसूर भोस।✝51:4 लूक. 15:18,21;रोम. 3:4.

5 हेर, अवं अधर्मे मां ज़र्मो,

ते पापे सेइं अपने अम्मरे पेटे मां पेव।✝51:5 यूह. 3:6;रोम. 5:12;इफि. 2:3.

6 हेर, तू दिलेरी सच़्च़ैई सेइं खुशी भोतस;

ते मेरे मने मां ज्ञान शिखालेलो।

7 जूफा*51:7 जूफा जूफा अक निकड़ो पौदो भोतो थियो, ज़ै पानी ते खून लोकन पुड़ शुद्ध भोनेरे लेई छ़िड़कनेरे लेई इस्तेमाल कियो गातो थियो। निर्ग. 12:22; लैव्य. 14:1-7; गिन. 19:1-6, 16-19. सेइं तू मीं शुद्ध केर, त अवं पवित्र भोइ गेईं;

मीं धो, ते अवं हिव्वेंरो ज़ेरो बड़ो छ़ित्तो भोइलो।

8 मीं खुशरी ते आनन्देरी गल्‍लां शुना,

ज़ैस सेइं ज़ैना हेड्डी तीं ट्लोड़ोरिन, तैना

मघन भोइ गान।

9 अपनु तुत्तर मेरे पापन करां फिरा,

ते मेरे सारे अधर्म मिटा।

10 हे परमेशर, मेरे अन्तर पवित्र दिल पैदा केर

मेरे अन्तर कायम रानेबाली आत्मा नंव्वे तरीके सेइं पैदा केर।

11 मीं अपने सामनेरां दूर न केर,

ते न अपनि पवित्र आत्मा मीं करां अलग केर।

12 मीं दुबारां एपनी मुक्तरी खुशी दे,

मीं इच्छारी आत्मा देइतां सम्भाल।

13 तैखन अवं पापी मैन्हु तेरी बत हरेइलो,

ते पापी लोक तेरे पासे एज्जेले।

14 हे परमेशर, हे मेरे मुक्ति देनेबाले परमेशर,

मीं कत्लेरे सज़ाही करां छुटा,

तैखन अवं तेरे धार्मिकतारे लेई जयजयकार केरेलो।

15 हे प्रभु मेरू आशी खोल्‍ल

तैखन अवं तेरी बडीयाई केरि सकेलो।

16 किजोकि तू बेलि सेइं खुशी न भोस,

नईं त अवं पेश केरेथो;

होमबलि सेइं तू खुशी न भोस।

17 ट्लुटोरो मन परमेशरेरे लेई बलिदाने;

हे परमेशर, तू ट्लुटोरे ते ढ्लन्च़ोरे मने

घटिया न समझ़स।

18 खुशी भोइतां सिय्योनेरी भलियाई केर,

यरूशलेमेरी शहरपनाह तू फिरी बना,*51:18 सिय्योन ते यरूशलेम अक्‍के नगरे।

19 तैखन तू धार्मिकतारे बलिदाने सेइं

मतलब जानबरेरे पूरे होमबेलि सेइं खुश भोल्हो;

तैखन लोक तेरी वेदी पुड़ पवित्र बलिदान च़ाढ़ेले।