Забур жырлары 1

Бірінші жазба

Беташар жыр: шынымен бақытты адам

1 Мынадай адам шынымен бақытты:

Ол құдайсыздар кеңесіне бармайды,

Күнәкарлар жолымен де жүрмейді,

Мазақтаушылармен бірге отырмайды.*1:1 (25:4,5; Ерм 15:17) Яғни қасиетті атаулыны менсінбей мазақтайтындармен араласпайды.

2 Қайта, ол Жаратқанның тәліміне қуанады,*1:2 Яки: Жаратқан Иенің (Таурат) заңынан рақат табады.

Күні-түні сол туралы ойланады.

3 Ол су жағасындағы ағашқа ұқсайды:

Сол мерзімінде жемісін береді,

Жапырақтары кеуіп те сембейді,

Не істесе де, ол табысқа жетеді.

4 Ал құдайсыздарда солай болмайды,

Олар жел ұшырған қабыққа ұқсайды,

5 Құдай сотында ақтала алмайды,

Әділдер қауымында орны болмайды.

6 Әділдің қамын Жаратқан ойлайды,

Ал құдайсыздың ізі де қалмайды.