Забур жырлары 90

Алла Тағаланың панасында қауіпсіз болу

1 Алла Тағаланың панасында тұрған адам

Құдіреттінің*90:1 Яки: Құдіреті шексіз Құдайдың (67:15; Әйүп 33:4; Езк 1:24). саясынан табады тыным.

2 Мен Жаратқан Иеге былай дейтін болам:

Бас сауғалайтын панам әрі қорғаным,

Сенімімді Саған артам, уа, Құдайым!

3 Хақ Тағала сені зұлымның тұзағынан

Әрі жойқын обадан*90:3 Яки: ажалды ауру-жарадан (індеттен). сақтайды аман.

4 Сені Өзінің «қанатымен» жауып алады,

«Қалқан мен қамалың» — Оның адалдығы,

Осылай өмірің қауіп-қатерсіз болады.

5 Түнде сен қара түнек қорқынышынан,

Күндіз де қорықпайсың жау оғынан,

6 Сескенбейсің түнгі індет-аурудан

Һәм тал түсте басыңа төнген апаттан.

7 Қасыңда мыңдағандар қаза тапса,

Оң жағыңда он мыңдап қырылғанда,

Саған зақым жақындай алмайды да.

8 Тек болып жатқанды көріп тұрасың,

Зұлымдардың жазаланғанын ұғасың.

9 Сен Жаратқанға сенім артып келесің,

Алла Тағаланы панаң етесің,

10 Басыңа енді жамандық түспейді,

Үйіңе ешбір апат та төнбейді.

11 Періштелеріне Ол сен жайлы бұйрық береді:

Қай жолмен жүрсең де, олар сені қорғап күзетеді,

12 Сен аяғыңды тасқа соғып алмауың үшін

Қолдарына көтеріп сені алып жүреді.

13 Жас арыстан мен оқжыланды*90:13 Немесе: улы сұр жыланды (57:5-6; Иш 11:8). аяқпен таптайсың,

Үлкен арыстан мен абжыланды*90:13 Немесе: айдаһарды. жаншып тастайсың.

14 Себебі Жаратқан Ие былай деп айтқан:

«Өзімді сүйгенді Мен құтқарып аламын,

Өзімді мойындағанды қорғайтын боламын,

15 Ол Маған сиынғанда құлақ саламын,

Азап шеккен кезінде оған жар боламын,

Аман-есен сақтап, құрметке бөлеймін.

16 Ғұмырын ұзақ қылып риза етемін,

Құтқаруымды оған сыйлап беремін».*90:16 Немесе: Өмір бақи рухани игілікке бөлеп, құтқаруымды оған ашық көрсетемін.